高海寧和莊思敏昨日出席於數碼港舉行的天梭錶新錶發佈會，同場有穿上比堅尼的模特兒行騷。高海寧甫見記者即投訴近日被狗仔隊跟，更險釀成意外，她說：「早幾日有狗仔隊跟，之前一直都有，但佢哋都知我駕駛技術唔好，所以唔會亂cut線，不過早幾日另一隊狗仔隊就跟得好貼，去到旺角有的士cut線，所以我急煞車，狗仔隊差啲煞唔切，我唔係想追究，不過希望佢哋唔好咁危險。」
否認拍拖
高海寧續說：「車上有四個男人，我落車後有兩個跟我搭電梯，我一個人去借衫，唔明點解要跟。」問她是否拍拖，因而惹來狗仔隊跟蹤？她說：「唔係，我家單身，之前影到嗰個係朋友，暫時想工作為先，唔想拍拖住。」
採訪：譚倩宜
攝影：陳俊強