【本報訊】已有近900人購買了團購券的V.I.HAIR髮型屋被消費者指摘劏客，以筍價引君入甕，付款時「任佢噏」。有網民持128元包洗剪染團購券，被要求支付附加費；另有街客光顧基本洗剪恤應付99元，付款時卻被索取兩倍費用。消委會發言人表示，團購投訴由去年2宗急升至今年逾250宗，不少商戶以平價及團購招客，細則不清晰容易引起爭拗，消費者購買前宜直接向商戶了解。
何小姐的男友到尖沙嘴柯士甸道的V.I.HAIR剪髮，價錢牌標明洗剪及造型收費99元，「點知畀錢時收200蚊，問佢點解，佢話曾經講咗句『剪快啲』所以咁收，仲聲大夾惡話唔畀錢就報警，佢凈係剪短咗頭髮，冇洗頭冇造型，價錢任佢講，好有問題」，幾經爭持下，何小姐的男友終付168元了事。
自動升級變資深髮型師
記者曾到該店放蛇，當時只有數名客人，付款時被索價168元，記者質疑收費，店員回應：「你睇清楚出面個牌，99蚊洗剪吹係初級髮型師價，牌下面仲有個資深髮型師價，要168蚊」。記者質疑入場時未有指明要資深髮型師，為何會自動「升級」？對方支吾以對，幾經爭持終收取99元，惟強調：「下不為例」。
拒購服務即獲黑面對待
V.I.HAIR曾透過團購網BEECRAZY推出原價808元，現優惠價128元的洗髮、剪髮、焗油、染髮團購券。有網民在網上討論區大呻搵笨，有女網民指髮型師以她頭髮過長為由，要求額外加收100元，惟團購細則沒提及任何額外收費；又有網友指全程被店員游說購買其他服務及美髮用品，拒絕即獲黑面對待，店員又稱每名團購客只拆賬68元，根本是「蝕住做」。
V.I.HAIR回覆指，該店分初級及資深髮型師，收費分為99元及168元，指定髮型師再另行定價。如初級髮型師有工作在身，便由資深髮型師操刀，惟事先會通知客人。至於團購客指被額外徵收100元，該公司解釋預設每名客人只用一支染髮劑，如頭髮過長以致多開一支，要額外徵收材料費，「128蚊團購網收六成做佣，我哋蝕晒本」。記者問為何沒與團購公司訂明細則，負責人回應：「細則太多，冇可能訂立晒，嗰客唔滿意可以搵團購公司退錢，有乜問題？」
團購網BEECRAZY表示，未有收過相關投訴，也拒絕透露與V.I.HAIR之間的協議詳情，惟表示已有890人購買該髮型屋的團購套票。
