18年冇喺北京開演唱會嘅譚詠麟，鐵定12月10日喺北京工人體育會再會一會班祖國粉絲，VIP門券要成2011蚊人仔一張，但仍然一票難求，皆因一開賣已經全數沽清。華華八到主要贊助商之一，係佢老友曾志偉有份代言嘅金至尊旗下「尊1網」。
贊助商拉隊捧場
華華即刻求證尊1網話事人、金至尊數碼CEO吳傑莊（Johnny），Johnny話，家陣仲未正式簽文件，但肯定冇走雞。佢仲話，金至尊老闆黃英豪已經plan緊，到時到底拉幾大隊人上去捧譚校長場，順便當係提早慶祝埋聖誕。不過，作為搞手嘅Johnny到時肯定冇得去，事關佢已經報咗名參加特首選委會選舉出戰IT界別，12月11日就選，點都行唔開。
Johnny話，佢係無黨派獨立參選人，只係希望可以選出一個有前瞻性嘅特首。至於點解喺IT界做咗10幾年兼薄有成就，今年先參選？佢話家陣37歲，覺得自己夠成熟能夠有所承擔，所以先夠膽報名。
咁又係，如果下巴輕輕又有乜缺失咁就出嚟選，盞淪為人家嘅笑柄。
李華華
mailto:[email protected]