先旨聲明，筆者並非大淡友，只是大行分析報告及專欄地盤，唱好的多，唱衰的極少。因此，特別欣賞分析員或專欄作家，在有充份理據下，對某隻股份發表不信任宣言。如果詳閱今期「投資導航」，你會知道投行研究報告，獨立成份少得可憐。口口聲聲話buyside及sellside互不相干，其實內裏幾可肯定涉及利益衝突。坦白講，古往今來，做好友永遠受歡迎過做淡友。
時下多唱好報告，有邊份你仲記得呢？我就記得唯一一份，就是07年10月大牛市時，瑞銀分析員GheePeh發表「神華101」報告，當時這位分析員將神華（1088）目標價大升兩倍至101元，推算內地長期煤價合理值為每噸150美元，貴過石油。神華股價未見爆升，但該分析員卻成為行內一大笑話。神華歷史高位不過56元，跟瑞銀目標價黏不上邊。
不過今年筆者最欣賞分析員，亦是瑞銀出身的。SpencerLeung5月底狠批利豐（494），目標價由16.5元大減價至9元，理據是在會計準則轉變之下，利豐盈利會有水份，事件罕有引來利豐反擊。但股價走勢勝於雄辯，利豐及後曾跌穿11蚊，較新目標價相當接近，算是成功的一份唱淡報告。
霸王超大雨潤全部K.O.
跟大淡友搭順風車，究竟搵唔搵到食。筆者找來近期廿份唱淡報告，如要賺錢，有三大指標。第一要睇出報告時，股價與新目標價水平差距，以利豐為例，出報告前股價17.5元，新目標價9元，如此震撼性肯定對股價有負面影響。相反，9月中多間大行狂削思捷（330）目標，但新目標價與當時股價相差無幾，自然威力大減。
第二是發表報告時機，早唱衰一般有着數。上周一野村成為首間睇淡騰訊（700）大行，目標價削至155元，結果一周內股價挫逾一成，差不多達標。
第三要睇大行江湖地位，外資基金通常會先睇高盛、大摩及瑞銀等大行報告，除非標奇立異，二三線投行報告，大戶根本無時間睇。
大行唱淡報告表現參差，勝算要睇市況而定，如要數股份Killer，《壹週刊》過去一年子彈例不虛發，唱嗰隻，死嗰隻。先係霸王（1338），然後到今年超大（682）及雨潤（1068），睇完書跟沽，起碼賺38%至82%。由此可見，壹仔絕對是淡友的超級Fans。
股榮