區議會選舉泛民大敗，公民黨係最大輸家，不但輸掉議席，黨魁梁家傑選後的多次發言，進退失據，惹來各方批評，令到這個本來一直有最高民望的大狀黨，陷入空前危機。事後我哋搵屬於少數能夠勝選的公民黨員司馬文（PaulZimmerman）飲咖啡，問佢點睇公民黨今次勝負同前景，佢好坦白講，公民黨不能只做「法律黨」，而係要做一個真正的「政黨」。
荷蘭人司馬文去年參與薄扶林的區議會補選贏咗，成為香港近年第一個，亦係至今唯一一個民選鬼佬議員。今年佢成功連任，係公民黨41個候選人當中能夠勝出的7人之一，1445票對805票贏對手成條街，得票比去年9月補選時仲多咗超過兩成。
本來薄扶林選區同陳淑莊的山頂選區好似，都係中上階層社區，但司馬文好似完全冇受外傭官司影響，空降勝出補選僅一年，就再次高票連任，反而陳淑莊就大敗一場。司馬文話薄扶林選民對公民黨的外傭事件同樣有意見，但有選民同佢講：「WevoteforyoubutnotfortheCivicParty。」關鍵係過去一年全力以赴的社區工作。
憑地區工作扭轉局面
佢話北京最終都要俾香港人有普選，北京要確保親建制派有能力在普選中勝出，佢哋為達目的努力多年，動員機器強，資源多，中聯辦協調下又夠團結。在司馬文眼中這是自然不過的事情，不表示民主派冇得鬥，他面對同樣挑戰，認為出色的地區工作能扭轉局面。
薄扶林區住戶唔會貪你啲蛇齋餅糉，司馬文亦都冇錢請選民食飯，所謂地區工作，係講緊更高層次的社區規劃。司馬文同陸恭蕙等人一早搞咗個關注香港城市規劃的組織「DesigningHongKong」，對於如何創造一個人性化的宜居社區，佢一向甚有心得兼積極。由改善區內行人道到建海濱長廊等，原來薄扶林的有錢人都十分上心，司馬文畀到人鍥而不捨，肯跟政府及發展商周旋的形象。
佢話，只要仔細分析公民黨各區敗選和勝選的原因，就知道不能夠把失敗簡單歸咎於對手借外傭官司抹黑。坦率的司馬文指，身兼立法會議員的陳淑莊確實太忙，投入地區工作的時間有限。黎廣德之前也沒有做太多地區工作，湯家驊更加係空降，真係輸得有道理。
至於外傭居港權官司，司馬文認為公民黨立場冇問題，體現了堅持法治原則，但沒有同時清楚交代一套全面和清晰的移民和人口政策建議，就係最大敗筆，讓其他人借題發揮。之後梁家傑多次發言，不斷歸咎被抹黑，更加沒有必要，唔講好過講。
贏選舉要Leadership而非Panic
他承認，公民黨的核心成員以大狀為主，特別關注法治問題，現在是時候想想如何由一個「法律黨」，發展為一個更加全面的「政黨」。司馬文打個比喻，公民黨一直關注進入公園的規則應該點寫，但市民同時想知道個公園裏面的規劃和佈局。
至於傑哥句句都被人批評，司馬文同意公民黨在敗選後的反應不理想，梁家傑需要謹慎言辭，不要一時否認失敗一時道歉，但沒有必要辭職。佢話係Leadership而非Panic才能贏出選舉。
司馬文素來係行動派，17歲就在家鄉的保守中學成立學生會，出版地下學生報，之後領導封鎖學校，成功趕走保守校長。84年來港工作、創業，如今已全身投入DesigningHongKong和區議員工作，問佢有冇興趣明年選立法會議員，佢話諗緊，但覺得在建制外推動政策不比建制內差。
我哋覺得，比例代表制下，十幾個巴仙得票率就有機會勝出做立法會議員，司馬文唔係冇機會，問題係輪唔輪到佢代表公民黨去選。