陝西省出咗條新例，包租婆想將層樓租畀外國人，10日前要向國家安全機關申請。據報道，條新例係為咗維護國家安全，規範建設項目同國家安全事項管理，新規定明年1月1號實施。老外諗住直接買咗層樓就唔使等審批嘅話，唔使諗嘞，因為租、買賣同埋贈送都要問阿爺，國家批先得。
至於其他涉及國家安全事項嘅建設項目，唔理係新建、改建定擴建，都要向國家安全機關申請，仲要申請行政許可。如果持有人或者使用人唔同，麻煩都要向國家安全機關申請。
搞到反恐咁，係就係大陣仗咗啲。不過，話晒陝西省省會西安係祖國嘅航天科技重鎮，即係咁，中國人應該唔怕老外嚟套取自家航天科技成果，皆因祖國有今日嘅成果都係靠「借鑑」返嚟，但如果老外間諜搵到未問自取嘅「借鑑」證據就唔係咁好囉！