中大師兄森哥做過好多份工，初出道時曾在東院道官小上午校教書，想唔到就因此與東院道官小奠下五十幾年嘅情誼，至今還是為聯繫東院道官小嘅師生，努力奔跑，搞到好多人都怕咗佢，但若無呢類儍老（森哥已經七十幾歲，夠晒老，不過精力驚人，好過不少五十歲就認老之人）周圍撲，又邊度會有小學可以出版一本憶校憶昔文集㗎。
森哥坐船去越南旅遊之前，傳真俾左丁山，指東院道官小同學周年聚餐在十一月二十七日星期日於利舞台廣場20樓玉桃軒酒樓舉行，五時恭候，七時入席，報名於十一月十五日截止。此外森哥附一段東院道官小校友文集簡介，佢話：「本書是第一本由香港官立小學師生共同撰寫文章出版的文集，讀者可從中瞭解早年香港官小教育發展的景況。作者中不少是現今各行各業的精英，包括《經濟日報》主席馮紹波、立法會議員湯家驊、前大律師公會主席陳景生、香港中文大學副校長程伯中、醫學院院長霍泰輝、香港教育學院副校長鄭燕祥、前建築署署長余熾鏗、財經界胡經昌、前防止虐待兒童會總幹事雷張慎佳及《地產霸權》作者潘慧嫻等，他們的童年故事、奮鬥經過，都可作為現今後學者的典範。
前校長司徒明有文章提及與司徒華的手足情，也是首次刊登。」
大記者百忙之中，幫森哥做編輯統籌，忙到一頭煙之時，俾森哥逼迫到冇命，先至可以收齊包括上述各位一共二十三位名人嘅文章，集合成書。大記者對左丁山講吓講吓都覺得呢間小學十分神奇，佢算係官小之後輩學生，本不知已往歷史，因統籌此書，認識好多好友，先至發覺小學可能人傑地靈風水好，可以出產咁多對社會有貢獻，有名氣嘅人物，講吓講吓，文集之校友作者還有牙醫梁承達（恒生梁太之丈夫）、城大教授楊月波、披圖梁等等，大賓架彭玉榮就因為事忙，未能執筆！
大記者話每位作者都寫得好有感情，細說昔年奮鬥歷史，不能不看嘅就係司徒明講司徒華嗰篇大作喎！