經驗話我知，每贏一場賽事，就有新賽道自動Unlock！唔係打機喎，而係最新藍光碟《反斗車王2》，Blu-ray版分為孖碟同埋三碟裝，除欣賞到首次曝光嘅Pixar短片，三碟裝更額外加送120分鐘BonusTrack，特別收錄「環遊世界製作特輯」，帶你走盡劇情以外嘅神秘賽道，究竟包括邊幾個國家？買隻碟返去睇咪知囉！
記者：陳國輝
7.1不如廣東話配音
藍光版提供兩種音效，包括英語DTS-HDMasterAudio7.1，以及廣東話Dolby5.1！好老實，要求高如想感受超低頻發出嘅引擎聲，又或者比賽劈彎時嗰種現場質感，我建議你都係選擇英語7.1較為適合；但係，個人覺得聽地道廣東話就更親初，特別由阿葛同林海峰嘅鬼馬聲音演出，以至羅家英突然爆多句「攞你命三千」，睇呢齣港式CG，話唔定比靚聲效更為重要。
至於畫面細微處，今集明顯集中於模擬實景嘅建築物，尤其日本彩虹橋、倫敦白金漢宮、巴黎鐵塔之類，逼真程度可謂難分真假，簡直好似同麥坤一齊遊埠參觀名勝一樣。
短片賽道加料放送
煲完接近兩小時「正場」，緊接就輪到睇「加長版」！身為Pixar粉絲，最想見到旗下嘅短篇小品，今次肯定無叫人失望，先來一齣約6分鐘嘅《飛天哨牙嘜》，故事延續到講佢想學飛，仲搞到參加飛行表演；跟住再睇《反斗奇兵》迷你騷，主角由Woody變成Barbie同阿Ken，內容更幽默爆笑，不失彼思功力！
三碟裝更特別收錄「環遊世界製作特輯」，唔單止回顧劇情出現過嘅東京、倫敦等主要賽道，甚至連從未曝光嘅德國慕尼黑，以及布達拉宮等神秘賽道，亦會在此現身！當然，Bonus還有彼思製作人專訪，同埋CG製作花絮，全碟長達120分鐘。
實景街道逐格播
