氣溫終於跌破20℃，濕度重得番55-70%，爆坼在所難免。一般潤膚膏只補你三兩個鐘，中醫話要潤就要由身體調理做起，再加埋外敷策略，呢個秋冬無身痕。
記者：朱崇德
攝影：蔡家輝
Model：Annie.G@GME
食療篇
內在潤一潤
中醫藥學術體系，在中國不足百年歷史；想搵古方偏方，絕對唔係喺書就摷到！七十一歲的任勉芝註冊中醫師，家族可追溯上六代從事傳統醫藥業，並曾任香港中國新醫藥研究院主任兼講師及復旦中醫學院函授部副院長，尋古方，問佢就啱。原來中醫有謂秋燥，因氣候乾燥引致口、舌、唇、皮膚乾燥，大便乾硬，以食療在內在潤一潤佢，自然外在都無咁Dry。
肥膏臭草綠豆沙 清潤
任醫師指綠豆甘寒未至苦寒，除非身體十分虛寒先唔啱食。唐代《食療本草》寫：「綠豆補益元氣，和調五臟，安精神，行十二經，去浮風，潤皮膚，煮汁止消渴。」佢清熱止痕，對付秋燥絕對掂，加埋臭草就有解毒功效。至於加嚿肥豬肉，係記者老父沿用從前軍人偏方，功效加倍，最神奇嘅地方係，煲完糖水面完全唔見半滴油，食落亦無油膩感，女士食都唔使怕肥。
材料：綠豆半斤、臭草適量、肥豬肉半両至一両，煲至起沙即可
鹹魚頭菜乾豆腐湯 墜火
試過燥熱之時食寒凉之物，搞到成面生瘡？正是極寒極熱相撞所致。飲呢個鹹魚頭菜乾豆腐湯啦！鹽或鹹的食品，好多時有墜火功效；墜火，就係身體燥火上升之際，令其緩減落嚟，任醫師：「菜乾屬清凉，豆腐黃豆製，屬滋補之物！」煲此湯時，鹹魚頭最好先煎後煲去腥；想再清甜啲，可再落幾粒蜜棗。
材料：鹹魚頭一個、豆腐一磚、菜乾四両、蜜棗二粒，煲三個鐘
生地甘草土茯苓 治濕疹
真係苦口良藥？今日遇到甜口良藥！呢味「甜藥」主要係針對濕疹人士，有止痕解毒藥效；皮膚爆坼或生到成身瘡瘡，食佢都有效。想藥效好啲，用大生地更佳。
材料：生地一両、土茯苓五錢、甘草二錢，二碗半水煎埋一碗（有傷風感冒時忌食）
外敷篇
輕度潤膚 黑龍膏
細個嗰陣爆坼搽乜？講得出雪花膏，你起碼係七十後！不過差唔多同期，其實仲有隻強力保濕護膚膏—黑龍膏！日本黑龍堂出品，舊版黑盒油性較強；新裝紅版配方較清爽，但仍然夠潤，就算有主婦手搽咗再濕水都唔會赤痛；小記個人經歷，家有手抱嬰孩皮膚爆坼紅腫，用盡名牌潤膚膏，一搽就喊，事關有刺痛感，惟獨黑版黑龍膏就無問題；不過現時黑版極難尋，紅版可於各區舊式藥房搵到。
全身鎖水 甘油+水
任醫師推介！佢有鎖緊皮膚水份、保持表皮角質層濕潤之效，最緊要係平！使用方法是將甘油一比一開水，洗澡後搽勻全身。
重度潤膚 乳化油膏
乳化油膏（EmulsifyingOintment）在師奶界又稱「豬油膏」，滋潤效果顯著，對手踭、腳踭尤其有效，皮膚乾燥嘅老人家甚至用佢嚟冲凉，搽上身再用溫水冲一冲，就自然形成一層保護膜。
平價浸浴 麥皮+茶袋
朝朝食嘅麥皮竟然有治乾燥之效，不過唔係內服而係外敷！外國人重興將麥皮加入水中浸浴，屋企無浴缸，可用煲湯袋或茶葉袋入起，濕水後輕抹痕癢地方，冲水後再搽潤膚膏即可。
後記：
呢啲清潤食療同護膚方法唔係女性獨玩，小記往年呢種天氣，每次剃完鬚，就算用盡護膚膏，剃刀所到之處例必爆坼！不過經此一役，皮膚明顯潤好多，剃鬚後連一點刀劃白痕都無，皮膚乾燥者值得一試。