近年新股推介會花樣多多，最流行係請班model行花生騷，或者送啲產品過你試用。不過呢招唔係個個都啱用，如果公司產品容易引起不必要嘅誤會同尷尬，華華都係勸你慳番好啲。
好似生產功能布料同內衣嘅廣豪國際咁，上個禮拜五搞咗場午餐會，華華有位男性友人啱啱去完，臨走時，公司送咗盒紀念品畀佢。個盒係嬌艷嘅shockingpink，朋友不虞有詐，以為又係啲紙鎮、USB之類。咁啱朋友之後約咗華華hightea，華華咁八卦，自然問盒嘢係乜嚟。點知朋友一開，居然有女裝性感lace底褲擺喺入面，仲有條男裝嘅「黑底」，話晒喺公眾場合「露」底，搞到朋友鬼咁尷尬，嗱嗱聲冚番埋個盒。
廣豪噚日亦搞咗個記者會，原來個個都一齊收到呢份「貼身」禮物。
其實commonsense都知內衣褲呢啲咁貼身嘅嘢，唔會隨便送畀人。就算知道係souvenir，唔會俾人哋honey誤會，都怕有投資者覺得「唔老利」，留低個壞印象，搞到無生意做就無謂啦！