就快太陽落山嘅特首曾蔭權，有鋪「埋單癮」，佢近日飛咗去夏威夷出席APEC會議，喺facebook幫自己多年來嘅出席率埋單，自誇多年嚟自己嘅出席率，僅次於汶萊元首博爾基亞。佢仲攞埋多年來喺APEC領袖身穿「民族服裝」嘅照片嚟抽水。照片所見，煲呔嘅身高多年以嚟，喺咁多領導人中由尾數起，「僅次」於幾位全場最矮領導人。
煲呔又不忙向「成功翻生」嘅前國家主席江澤民擦吓鞋。話說1995年嘅APEC會議喺大阪舉行，老江同煲呔喺一個午餐會上相鄰而坐，老江喺餐牌背面即席揮毫，寫咗「港人治港、一國兩制，保持繁榮穩定」14粒字送畀煲呔，煲呔當係寶keep到家。