黃精甫在完成電影《江湖》和《阿嫂》後，離奇地停產了五年，似是無以為繼，去年卻忽然復出用了日本AV天后蒼井空加麥浚龍拍了一部算幾cult的電影《復仇者之死》。他用大病初癒參透生死形容這次出山，以前想不通的如今開了竅。從前沒去想的一下子都湧到心頭，正義是否存在？天下是否李家？都憑那些年的一套卡通片《宇宙大帝》，讓黃精甫這個屋邨仔借此創作了電影《保衛戰隊之出動喇！朋友》來驗證。
撰文：何永寧、黃曉妍
原本是眼鏡設計師的黃精甫，入行經歷跟他的電影一樣曲折離奇，悶悶哋走去參加獨立短片製作得了獎，自此愛上電影，為進一步深造，他走去TVB當助導，做了半年不到就急急腳走人，他說：「成個架構都係廢，完全冇發揮能力同自由空間。」
令黃精甫改變一生的是替電影公司中國星打工，為電影拍宣傳片，他說：「嗰時中國星開好多戲，日日喺片場睇班導演開工，杜琪峯、林超賢、徐克、林嶺東，個個都係勁人，嗰段時間好似嚿海綿咁吸收。」後來獲曾志偉賞識拍了電影《江湖》就跟劉德華和張學友合作。他還記得當年是導演葉念琛約他跟志偉見面，他說：「當時葉念琛仲幫緊志偉手，佢約我同志偉同一班編劇見面，喺酒店咖啡室傾咗一次，佢就叫我上佢公司開會畀咗個劇本《英雄無用》話會搵個靚女同我一齊度劇本，嗰位靚女就係杜緻朗，即《殺人犯》嘅編劇。」之後曾志偉將劇本讓劉德華看，喜歡到不得了，於是決定和這個名不經傳的導演合作。
「聽菲林聲都驚」
黃精甫記得第一次跟華仔見面是在志偉的辦公室，劉德華一上來還向他要了杯水，他說：「佢上到去話要飲水，我咪斟咗杯水畀佢，華仔仲以為我係志偉助手，可能我個樣太靚仔唔似導演，直至志偉同佢講『呢個咪係你套戲嘅導演囉』，華仔先知會同呢個死仔合作。」第一部電影就與劉華和張學友兩位大牌合作，但過程愉快，拍的時候也不知天高地厚，直至電影即將上映才曉驚，他說：「拍獨立電影製作費多極咪幾十萬，今次投資1,400萬，票房唔得咪死，唔只怕輸仲驚對唔住人，反而志偉就好淡定。頭一部片就咁大製作真係返唔到轉頭，不過畀我嚟多次我都係會拍，劉華喎。最壞係乜都冇，我本來就乜都冇，都冇嘢輸，個心至定啲。」
頭一關過得不過不失，另一部電影《阿嫂》才是黃精甫跌落深淵的作品，這次志偉親自演出更找來黃秋生和任達華等幾位影帝助陣，黃精甫強調問題不是出在演員身上，但堅拒透露詳情，他只肯說：「全部都係行政架構嘅人事問題，同演員完全冇關，嗰兩個月令我經歷晒所有拍電影都遇到嘅問題，嗰次之後令我聽到拍戲時嘅菲林聲都驚，直情係想嘔。係太驚令到之後五年都唔敢拍戲。」不過人始終要吃飯，惟有拍MV賴以維生，他說：「嗰時低處未算低，銀行使淨30蚊，要問媽咪借番以前拍戲畀佢嘅錢用，最後咪接番啲MV拍搵錢，第一日聽見啲機器聲都好唔掂，要幾日至適應到。」
拍了幾套廣告和MV後，令黃精甫想通一個道理，40歲不到的他語重心長說：「嗰幾年令我諗通一樣嘢，之前覺得電影同我係榮辱與共，家反而覺得導演係一份工作，電影應該有使命感，所以乜都可以拍，唔好睇自我太重。」復出第一部電影就拍了《復仇者之死》，雖然題材較沉重，但他的心情卻出奇輕鬆，捲菲林聲都變成曲譜。今趟拍的是更輕鬆將兒時喜愛的卡通片幻化成電影，他說：「自己屋邨仔細個就最鍾意睇卡通片，記得有套《宇宙大帝》個男主角每次出發都會大叫『出動喇』，所以用咗嚟做片名，仲同日本買咗佢首歌做片頭開場。」
藉電影喚醒現代人
黃精甫覺得現代人越來越功利，失去了力想像，希望借這個發生在屋邨的故事為觀眾找回童真，他說：「記得以前住屋邨啲人好守望相助，戶戶都開晒門嘅，家貧富懸殊變成李家天下，人都變得疏離，想借呢個故事將自己嘅世界觀講出嚟，其實呢個世界係仲有正義。」他自言從來不關心身邊事，現在就像大病初癒般開竅。
Juno拍到氣管敏感
麥浚龍（Juno）指《保》片是以人所熟悉的卡通片《宇宙大帝》為背景，話題探討正義是否存在，當中再加入超人這枝節，正好測試香港觀眾的接受能力，Juno說：「唔止日本，我發現喺泰國、印尼呢啲地方都有超人片，呢種題材唔係特別罕有，只係香港市場比較少有。」
苦不堪言
Juno片中有不少動作戲，最辛苦莫過於他在七架正燃燒的車間打架，Juno說：「呢場戲喺室內拍，煙係黑色，未埋位，大家都要戴防毒面具，拍咗十幾日，拍完第二日，我都要入院打針，因為氣管敏感。」苦事還接踵而來，稍後要推停一架正滑行的車輛，他苦笑說：「以為架車速度好慢，點知回彈力令我飛出鏡頭以外。」
先後拍過《破事兒》、《維多利亞壹號》和《復仇者之死》等另類影片，Juno並非只拍另類片種，他說：「唔係唔鍾意商業電影，只係今次咁啱又遇到呢類片，又可能我畀人有邪氣感覺。」
故事簡介：拳頭出大俠
電影《保衛戰隊之出動喇！朋友！》故事講述生於公屋的小雙（麥浚龍飾），目睹警察對父見死不救而被匪徒轟斃，令他自小只相信拳頭，聲稱曾見過蒙面俠的大鵬（溫超飾）對小雙甚崇拜。
家棟復仇
在擊潰村霸一役，小雙引來松本集團老闆韓羽（王羽飾）的垂青。在奇怪面試中，小雙認識了實力深不可測的鄺盛（林家棟飾），在機緣巧合下救了老闆的獨生女安妮（鄧麗欣飾），令他成為安妮的貼身保鑣。
不過，韓羽發現綁架案的元凶，居然跟自己的保鑣成員有關，他不但要負責保鑣團的鄺盛葬身火海，還換掉整個保鑣團，大難不死的鄺盛決意復仇……而世上果然有蒙面俠存在。
