黃榕近日因為舊愛陳冠希（Edison）被爆與16歲模謝芷蕙（Cammi）拍慾照，頓時成為追訪對象，黃榕念及舊情不時開腔力挺Edison，令人誤會她未忘舊愛，不過原來黃榕身邊不乏追求者，前晚更獲金毛男大獻殷勤，為她孭手袋及掃街頭食物。
現年29歲的黃榕出道以來性感形象深入民心，當年淫照主角陳冠希掀起慾照風波時，黃榕被爆曾與Edison拍拖，她亦不時提及舊愛的冧女絕招。近日媾女成性的Edison再有慾照流出，今次對象更是年僅16歲的模Cammi，事件震驚全港，加上Cammi日日出招博見報，令黃榕也受牽連，成為被追訪對象之一。
過馬路搭背脊
Cammi日前受訪時暗示Edison不舉，黃榕則為舊愛平反，踢爆Edison性慾強、需索大，傾傾吓偈都要嚟，黃榕即被誤會未忘舊愛。其實黃榕現時已有一位感情要好的男友，但身邊仍不乏追求者。
前晚黃榕到旺角上跳舞班，離開時與兩位女同學及一位金毛男同學同行，金毛男對黃榕甚嗒糖，沿途只顧撩黃榕吹水，又大獻殷勤幫她孭手袋。過馬路時金毛男乘機輕搭黃榕的背脊，之後黃榕見肚餓就嚷着要食格仔餅，金毛男二話不說付錢購買。
眾人之後到粥麪檔食消夜，金毛男和黃榕一坐下即耍花槍，兩人旁若無人扮打詠春，互相格鬥一輪後，大食黃榕繼續狂食，眾人食飽後就離開。
「係正常社交」
對於獲金毛男獻殷勤，黃榕昨受訪時說：「個男仔係RapperMCDirtyR，我哋之前合作過，佢住附近，食飯睇戲係正常社交。」黃榕強調接受跟異性單獨睇戲，但絕不隨便上別人家，擺明寸爆Cammi。
採訪、攝影：彭琮然、黃文成