很討厭自己最近的口頭禪，是在人家講完任何嘢無耐，自己接口講偉論時，總是喜愛在句字前加一個「唔係」在先，「唔係，其實係……」「唔係，事實係……」彷彿自己就是先知，道理都在自己的那一邊，有時自己想阻止自己扮晒嘢，但「唔係」這兩字，實在太易出口了。
扮勁的人除了面目可憎之外，最大問題是當今世上太多問題沒有所謂的標準答案了，於是越堅持己見就越容易「瀨」嘢，而越以為自己永遠是對的，就越容易錯晒。
有雞先，定有雞蛋先？這條疑似無聊的問題，最適合在一席無話的飯枱上討論，好明顯答案不是重點，討論過程中的創意才是精采之處，是一言堂還是聆聽者，一試即知。其中一個參考答案，由教友提供，創世紀話齋，上帝創造雀鳥在先，無包生蛋噃，認真答，就笨了。
看電視節目講梵高，話說他生前有幾幅曠世巨作是在精神病院裏完成的，細個睇書講到這裏通常的講法是他行為有異被送去精神病院，所以我們習慣了說「嘩，儍嘅都畫到咁靚！」但電視講的另一角度，說梵高原來是自己主動要求入院，旨在去觀察其他病人；咁究竟邊個先係儍的呢？
生活上遇到更多的問題，令我越來越發覺自己無知，譬如電腦，究竟用完之後應該關機還是由它自然關呢？有人說電腦就像電視機，當然要熄機啦，長期stand-by的話，爆炸都有之呀；又有另一班講法電腦就像雪櫃，邊使理佢㗎。環保要開少些燈，但有人又話開燈又關燈，比起長時間開燈還要耗電呀。
然後每日打開報紙，又有不同的新聞衝擊傳統智慧……，一日一蘋果原來沒有好結果、每天8杯水其實是太多、鬥牛原來本身是色盲，從來不知甚麼是紅色、美國人根本沒有踏足過月球，片段都是假的，因為月球沒有風，但那支美國國旗卻隨風飄揚……
生活的真理可能只有一個，就是沒有真理，惟有隨時都準備好接受更多的真理，才不至於太快變成固執阿叔，下次遇着「撳錢」唔中就嗌造馬的，又或是賭波失手就話假波的朋友，我會改改我的口頭禪，「係」好過「唔係」。
文：keyman