NBA因勞資糾紛封館而上演無期，但有前南華後衞、現效力福建潯興嘅羅意庭在內嘅CBA，下個禮拜六（19日）就如期上演！聽日就24歲生日嘅阿庭噚日放假，由福建返香港，仲剪咗個靚髮型迎接新球季。南華班主洪游奕仲專登約晒班球員食餐飯，為佢預祝生日，同埋為噚日33歲正日生日嘅李嘉耀慶祝；李嘉耀更將生日願望轉送畀已懷胎7個月嘅太太：「生個肥肥白白嘅兔女。」
NBA封館造就JR史密夫等球星來華落班，阿庭坦言好期待︰「自己以前只會喺電視見過嘅球員，冇諗過可以同場鬥法，真係好興奮。」事實上，潯興今年有前國手呂曉明離隊，阿庭早前3場熱身賽都擔正打正選控衞，所以佢今年嘅生日願望寄望係：「可以在CBA順順利利，身體健康協助球隊躋身季後賽。」