「機會我可以製造畀你，但你一定要有實力！」憑藉南華籃球隊班主洪游奕嘅一句說話，成為21歲嘅港籃前鋒周健宏（肥宏）做人嘅座右銘，佢下周仲離開香港，重返母親家鄉南韓，下年入讀曼聯球星朴智星曾修讀碩士課程嘅明知大學，目的當然唔係想搵番個「野蠻女友」，而係為自己嘅職業籃球夢進發！
爭入KBL冇時間搵女友
21年前，有個中、韓混血兒喺亞洲籃球實力數一數二嘅南韓瓜瓜落地，縱然呢位小朋友自3個月大就移居香港，但流住籃球熱血嘅佢，由細到大都稱霸球場；但香港冇職籃制度，令球員嘅水平停滯不前。舊年停學一年專心打籃球後，肥宏喺同樣係混血兒嘅南韓籃球國家隊朋友李東進鋪橋搭路下，加上伯樂洪生全力支持，終放棄香港大學專業進修學院嘅學位，下禮拜六前赴南韓升學，力圖喺畢業嗰年嘅選秀會，爭奪一張入KBL（韓職籃）入場券。
「CBA我都有諗過，但自知冇速度、防守又差，希望喺南韓4年大學生涯可以改善。」身高1米94嘅肥宏，喺南華浸淫兩年，思想都大個仔咗，點都有啲嘢唔捨得，「最唔捨得喺香港做嘢嘅爸爸，以及相識9年嘅「佐治之友」……（咁女朋友呢？）我家冇，就算去到南韓都唔會諗，一來嗰邊喺軍訓式練波，我哋班球員會同『正常學生』分隔，二來我過去係專注打籃球，希望兩年內可以喺校隊站穩陣腳。」但肥宏都爆咗句︰「嗰邊啲女仔都幾辣㗎。」
感謝班主洪游奕栽培
愛情無邊界，有半個南韓人血統嘅肥宏，大方承認自己係「少女時代」嘅「粉絲」；而母語之一嘅韓文都識聽、識講，只係睇同寫仍要惡補。佢話下周過到南韓都會先由母親帶路，畢竟南韓嘅交通工具都係寫韓文，英文都唔多隻。肥宏最後不忘再多謝洪生︰「佢幾時都當我哋係仔，老實講，冇佢冇我，對羅意庭（現效CBA福建潯興），或對我出外都好支持。香港咁多間大學每年有數以千計畢業生，但冇洪生，10年都未必出唔到一個羅意庭！」
