【別英魂之緬懷兄弟情】許冠英大前日因心臟病發猝死家中，大哥許冠文昨日到跑馬地會所游水，心情沉重，紅着眼詳談三弟阿英往事，他說：「好傷心！呢個細佬我最錫，成日要。」提到許冠英的身後事，許冠文謂會由許冠武全權負責，阿英的遺體則會火葬。
許冠英大前日因心臟病發猝死，終年65歲，其兄長許冠文昨午與太太離開大坑寓所，司機先載許太到銅鑼灣Sogo超市購物，再送許冠文到跑馬地會所游水。許冠文喪弟之痛仍未平復，但他也大方接受記者訪問。記者問許冠文有沒有說話想講，此時他已掩不住哀傷，兩眼通紅，他強忍淚水，停了一頓才哽咽說：「好傷心！呢個細佬我最錫，成日要。」他想起阿英小朋友扭計的樣子笑了笑。
未見過阿英女友
許冠文續說：「咁蹺，之前喺廣州阿Sam（許冠傑）嘅演唱會，佢客串，我啱啱又喺度，又啱啱佢生日，我同成萬人為佢唱生辰快樂，咁啱又係最後一次，我都未試過唱生日歌畀佢聽。」提起許冠英有心臟病，許冠文詳細解釋說：「佢好唔聽話，醫生話佢心瓣率唔正常，喺兩、三年前做咗手術，裝咗個心臟輔助器。前一日佢同阿Sam夾歌，話背脊好痛，其中一個醫生話佢應該心臟有問題，本來佢要即刻見醫生，但佢話翌日至睇，仲叫助手翌日（即大前日去世當天）去佢屋企接佢，第二日下晝五點助手去到佢屋企，要報警撬門，開門就見到佢瞓喺張床，一隻腳掂落地，應該係唔舒服攞唔到藥。」他深呼吸了一下，自我安慰說：「幾好……佢又唔辛苦，安樂喇，呢啲嘢可大可小，最慘半天吊，半身不遂，佢又無兒無女。」
有否見過阿英的女友？許冠文說：「從來冇見過，過去10幾年，好似話有個女朋友，我未見過。」記者告訴他阿英曾被拍到與日籍女友約會，許冠文含糊說：「佢從來唔講，好耐以前話係有個女朋友，話之後嫁咗畀第二個……之後就有個契仔，但唔係佢個仔，已經係18幾年前，仲有幾死黨。」
「阿Sam最痛心」
至於阿英喪禮的安排，冠文說：「另一個細佬（許冠武）搞緊，會火葬。」阿Sam心情如何？他說：「佢最痛心，阿Sam所有演唱會，阿英都喺度，佢哋互相撐咗咁多年。佢成日上阿Sam屋企，直情係佢半個屋企，佢係幾孤獨一個人。」說畢許冠文感慨地離開。採訪、攝影：朱志聰