超高清勁過藍光四倍　4K開畫

如果你仲滿足緊藍光碟嘅1080P全高清畫質，咁你就Out喇，比佢靚足足四倍嘅4K時代即將來臨！因為之前近百萬身價嘅4K投影機，終於推出家用版。JVC最新民用4K投影機，最低入場費只為$69,800，玩到超高清兼對應埋3D，屋企大可隨時變成迷你戲院開場。

記者：許福合
攝影：陳盛臣
Model：Kelvina@PureModels

何謂4K？

■JVCDLA-X90R（$89,800/a）
JVCDLA-X70R（$69,800/a）

4K影片，是指解像度達到4,096×2,160，總像素超過880萬像素，與2K全高清1,920×1,080的Blu-ray影碟比較，4K的解像度是2K的4倍。超高解像度能有更細膩影像，電影要表現各種的材質效果亦更容易，而且論色彩及光度都會有更佳效果。
4K要真正入屋，現時仍有唔少限制，首先，片源是一個問題，現時大部份BD電影，在經過Remastering之後，都是以2K的標準畫質製作，使用4K的器材播放2K的畫質，就有如谷大畫面，滿足唔到4K像素要求，自然難以有最佳效果。另外，4K的顯示畫面要夠大，才足夠發揮超高清畫質，所以在欣賞4K影片時，能投射上百吋畫面的4K投影機會有一定優勢！

民用機登場

JVC即將推出的4K投影機，分別有DLA-X90R及DLA-X70R兩款，之所以叫做民用級，全因專業級4K投影機開價便近百萬，而入門級的DLA-X70R則只需$69,800，相較下售價差不多比一折還要低，相信對普及度有極大幫助。除咗價格平民化外，解決了片源問題都係優點之一，原來JVC與NHK正在開發超高清系統，打算在2020年推出，而當中包括一個e-shift技術，呢套未來科技厲害之處，係可以將一般2K影像倍增成接近4K的3,840×2,160解像度，同時提升垂直及水平的解像度，將畫質提升到接近4K的水平。相比於2K畫面，在影像質感及顏色都會更加豐富。

■JVC同NHK合作研發的e-shift技術，可大幅提高2K影片畫質。

■e-shift技術可將2K藍光碟，提升到4K水準。

藍光畫質仲有得升

實試過才能分出畫質高低，JVC安排了上代的DLA-X9（2K）與最新DLA-X90R（4K）比較，無論3D或2D都存在極大分野，憑藉e-shift幫助，藍光表現再次幾級跳。

■右面DLA-X90R畫面，貓頭鷹的白毛非常細緻，走近屏幕幾乎可以逐條數。

■在整體亮度上贏晒，光暗均勻唔刺眼，連遠處廣告牌都變得清晰。

120,000：1原生對比度

除咗輸出到4K超高清影像，及提升藍光畫質外，新機還有其他規格優勢；首先，投影機重要之一是對比度，JVC其中的DLA-X90R，便使用第三代D-ILA高動態光學影像引擎，原生對比度就達到最高的120,000:1，顯示極黑及極白畫面，都有更高細緻度，唔會無晒嘢睇。此機還具備isf認證，可作專業級微調，包括新加入1/16像素校正、多達121點的調校及255種預設屏幕選擇等。若想影片更加有電影感，亦可開啟3種Xenon燈膽色溫模式，模擬電影播放的效果。
3D影像投射亦係今次新機特色之一，尤其看電影，3D更加係必備！JVC新推出的投影機，使用全新驅動器，令到3D眼鏡的快門曝光時間變長，讓更多光線進入眼睛，用家在欣賞3D的電影時，就可以睇到更光亮的3D影像，同時可降低信號干擾，畫面會更穩定，減少跳動，長時間戴住都無咁攰。新3D眼鏡仲有快叉功能，充電15分鐘，可用到3小時，最長就可有40小時！對於原2D的影片，內置2D3D轉換器就相當好用，由2D轉3D影片，而用家更可自行調校3D投射影像嘅深度，而效果亦好有驚喜，尤其層次感一流，幾可媲美一般3DBlu-ray效果！