【本報訊】歐資大行齊沽貨散水！意大利債息飆升，觸發歐債危機再度升溫，全球出現骨牌式股災，港股昨日再現恐慌性拋售，恒指埋單大瀉1050點（5.25%），收18963點，是8月9日以來最大單日跌幅，主板成交747億元，日內連失兩萬、萬九兩大心理關口。沽盤當中，以歐資行沽得最狠，由藍籌至二三線基金股，盡現其出貨手影，擺明以實際行動對後市投不信任票。記者：李嘉麟
大市昨日傷亡慘烈，近1600隻主板股份中，逾千隻下跌，上升股份僅74隻，45隻股份跌幅達一成以上。藍籌更出現要錢唔要貨的拋售場面，除電能（006）及國泰（293）力保不失外，其餘無一幸免，45隻藍籌中，21隻跌幅逾半成。
滙控表現差絕藍籌
歐資行盡顯離場決心，全日沽售不絕，長實（001）、恒地（012）、新地（016）、信置（083）及恒隆地產（101）昨日一度掛滿瑞銀沽盤。此外，多隻跌幅顯著的基金股，如TCL通訊（2618）、馬鋼（323）、中聯重科（1157）、中傳動（658）等，不難發現里昂、瑞信、法巴、德銀、法興等歐洲行出貨手影。
剛公佈失望季度業績的大笨象滙控（005），以及有配售消息的內銀股，成為投資者怒掟對象。滙控挫逾9%，是表現最差藍籌，單是該股已拖低恒指283點。高盛前晚突然以4.88元至5元配售23億股工行（1398）股份，該批股份至昨日開市仍未全數獲承接，工行股價顯著下挫逾8%，收報4.74元，失守配股價下限。其他內銀股沽壓亦沉重，盛傳快被美國銀行配售的建行（939）及中行（3988）跌幅均逾半成。
18900點料有支持
海通國際中國業務部副總裁郭家耀表示，歐洲局勢左右環球市況，但港股經歷昨日急跌後，料在50日線18900點水平會有初步支持，暫毋須過於悲觀。永豐金融集團研究部主管涂國彬認為，大市昨日之急雖有點意外，但恒指19000至20000點之間的上落局面仍未打破，不過，歐洲方面難有好消息，策略上投資者宜趁高減磅，忌胡亂溝淡。
城大MBA課程主任曾淵滄亦叫散戶勿自亂陣腳，「個市跌一千點，唔使驚！等番佢十年廿年就一定會上！」，曾教授指面對風風浪浪，最簡單做法就是唔好驚，就咁放低股票喺度。不過，散戶何先生對後市感悲觀，「而家都係炒波幅，估跟住都係跌一跌又再升嘅格局，但而家係咪低位就真係唔敢講，揸重貨嘅話應該再跌低啲先諗。」
要留意，昨日沽空金額增至68億元，沽空比率升至半個月新高的9.1%。受外圍市況拖累，內地A股同遇沽壓，滬綜指收2479點，跌1.8%；深成指收10477點，跌1.4%，兩市成交合共1757億元人民幣。
基金建議
極速調整 撈資源股
「港股落返嚟呢啲位唔使調整預測住，呢轉好可能係一個極速調整，跟住又冇乜事。恒指大支持位應該喺18200點，但18800點應該都頂得吓。投資者可以撈啲貨，唔應該再造淡住，因為值博率有限。股份方面，本地銀行股及地產股升得少跌得快，呢啲唔使睇，要撈就應該撈資源股。」
以往繁榮 或是虛假
「港股會唔會一浪低於一浪仲好難講，可以肯定市場會好反覆，投資者要非常量力而為。冇乜sector特別睇得好，因為全球一體化，中、美、歐互相牽制。以往嘅繁榮，好可能一部份係虛假，將來能唔能持續都好成疑問，唔係話一個國家搞掂咗，第二個國家就冇事，會好似火燒連環船咁。」
散戶意見
正股當牛熊證炒
「早兩日出咗貨，趁個市跌得急，撈番啲博短線反彈，但唔敢大注。藍籌暫時唔諗住，大戶要鋤都鋤大價股啦，況且好多明星股好似滙控、比亞迪、思捷都已經變咗質……不過家正股都當牛熊證咁玩，要超短線，朝早買、下午彈，已經要走，一有糊食就食，因為唔會知外圍今晚會發生咩事。」
