泰維斯又有新搞作。呢位曼城棄將趁國際賽期間飛返去阿根廷，違抗球會要佢星期三歸隊操練嘅命令。佢一心等到1月走人，家就先返老家風流快活，攬女曬太陽。但佢嘅曼城隊友高路托尼就慘囉，因為年初服用禁藥事件，被球會罰咗6星期人工；佢但求盡快爭番個正選位，呢幾十萬鎊都係惟有硬食，兼勤加操練喇。
當球會冇到周三拒歸隊
泰維斯因為罷踢事件俾曼城罰款4星期人工，但經球員公會介入減到兩星期罰40萬鎊。原本傳泰維斯會就判罰上訴，但最後決定唔上訴，據講係希望曼城可息事寧人，等到1月就定個合理價錢賣走佢，唔使繼續留低投閒置散。
但罷踢風波告一段落，泰維斯星期一飛去離曼市半個地球咁遠嘅阿根廷布宜諾斯艾利斯，好風騷咁同記者講「嚟到要休息一陣子」，睇怕陽光海灘加美女都冇走雞。泰維斯嘅發言人麥卡菲回應話今次返去阿根廷純粹係探吓屋企人。曼城要求泰維斯喺周三朝早歸隊，仲特別為佢預備咗一套恢復狀態嘅計劃，結果都係人影都冇。今次泰維斯當球會冇到，據講曼城已尋求緊法律意見，肯定手尾長。
高路托尼被罰900萬
泰維斯風流快活，隊友高路托尼嘅態度就肯定截然不同。托尼嘅禁藥風波總算完結，破財擋災後知恥實行狂操，爭正選搏表現報答球會嘅支持。
司職後衞嘅高路托尼因食錯咗老婆嘅減肥藥，今年3月被驗出服用禁藥，一直停賽到9月先復出。球會周二發表聲明，指內部紀律委員會已經成調查，決定重罰托尼6星期人工，即係72萬鎊（約900萬港元）。曼城對高路托尼算係咁，喺停賽期間都一直有出糧畀佢，亦都冇懲罰性咁沒收佢肖像權收入，據講都有成140萬鎊。
高路托尼9月復出後只係後備上陣兩次，相比之下佢細佬耶耶托尼就威好多，上周曼城作客3:2贏昆士柏流浪，正係耶耶入球奠勝，領隊文仙尼亦好識做喺完場前派高路上陣。有球會撐又有兄弟拍住上，高路冇咗6星期人工，都會全心全意為曼城打江山。