賭王何鴻燊今個月90大壽，各房花心思為賭王賀壽出招。三房長女超雲指二房打尖搶先20號，令她們21號壽宴受阻，又擔心賭王身體捱不住。二房揸弗人何超瓊前晚反駁指各房陪賭王機會、時間均等，更踢爆三房賀壽期其實由二房讓出，還表明會就賭王身體行事，暗寸超雲不成熟，壽宴想搞大龍鳳。
賭王何鴻燊本月25日90大壽，四房爭賀壽，爆出鬥快爭期風波。二房比往年提早，今個月20日為賭王在君悅擺大壽，三房長女何超雲日前就指三房原定21號，埋怨二房打尖兼搞到賭王勞累。
「不嬲各自安排」
二房長女、揸弗人何超瓊前晚在灣仔出席雜誌活動，由四個保鑣保護下入場，一提到超雲指她不覆機，她即不慍不火說：「可能佢有打畀我，我收唔到，之後佢冇再搵我，唔係乜大問題，不嬲生日都係各自有安排啦。」三房指她與二房20號打尖，超瓊即說：「其實21號（三房賀壽）係我哋讓畀佢哋，大家都好清楚邊日做啲乜，唔使多澄清、多解釋。」
談到賭王身體可應付得來？超瓊說：「佢一向有咁嘅能力、興致同各個家庭慶祝，絕對冇問題。」至於二房為賭王擺大壽，有甚麼節目安排，超瓊表明會因應賭王身體、作風安排，食飯見朋友，反寸三房指二房拖累賭王身體：「我哋比較成熟，爹哋畢竟年紀大啲，都係食餐飯，我唔知其他人有乜安排，但我哋嚟講，一定係顧及爹哋係咪應付到，佢盡興同開心，所有嘢按照爸爸、媽媽要求去做。」
捐百萬作賀禮
賭王正日現時變成由四房賀壽，又惹來二房失寵之說，超瓊即擺出大家姐姿態：「我哋每日都安排唔同嘅時間同爹哋相聚，大家都有均等機會見面，冇正日唔正日嘅問題。」她又拒評超雲是否小事化大。二房過去幾年都夾錢捐過百萬元給公益金作為賀禮，她指今年也會捐錢。
採訪、攝影：譚倩宜