下屆諾貝爾獎如果諗唔到要頒畀邊個，華華就建議可以考慮頒畀牛熊證嘅發明家，點解咁講?因為每次當你落注某一邊時，個市「咁啱」就會向另一邊行，所以無論你買嘅係牛仔定熊仔都會打靶，但之後個市又會「咁啱」行番你買嘅方向。
問10個買過牛熊證嘅朋友，差唔多10個都有以上經驗。
星期一now財經台訪問《金融海嘯》系列作者楊衞隆，講起牛熊證，佢直頭七情上面，話要禁咗牛熊證，「我嘅意見唔係畀啲散戶，係畀啲官，啲官唔應該畀證券行、銀行去賣呢啲好似雷曼迷債（嘅產品），仲要講呢啲係啱㗎、係合法㗎。合法一件事，應唔應該做，係另一件事」。
楊衞隆籲港府禁制
佢舉咗幾個例，例如9月1號11億份熊證打靶，之後恒指就急跌；又例如10月4號恒指差唔多見底，穿萬七點再插，殺牛證7億份，之後股市係點？咪急升囉！楊衞隆話，「所以，你買牛證，冇錢賺；買熊證，亦都冇錢賺。」
殺嘅唔止係牛熊證，仲有活生生嘅散戶，楊衞隆話有個大學生喺中大跳樓，死前喺社交網站話自己投資牛證失利，「跳得樓」。
楊衞隆仲叫啲官反省吓：「記住呀，天地有正氣」。
不過，大陸嚟嘅港交所行政總裁李小加忙緊增加港交所成交量，華華諗佢都係聽唔到㗎啦！
李華華
mailto:[email protected]