樂壇新人GinLee於無綫節目《超級巨聲2》踢館而為人認識，加盟了bma的她現正努力學廣東話，希望以廣東歌打動香港樂迷。不少朋友主動教Gin講粗口，她說：「我怕聽完之後入咗腦，之後又唔記得係粗口，唔小心講咗就弊。」
今年備受bma力捧的新人GinLee，加入香港樂壇的首要任務就是學好廣東話，原來她早前到香港生活有點不習慣，雖然識得講少許廣東話，但很多時都聽唔明，令她感到懊惱非常。
最想出發燒碟
Gin表示初時有不少朋友主動教她粗口，她笑言：「好多朋友話學一種語言，第一樣要學嘅就係粗口，我唔畀佢哋教我，因為我怕聽完之後入咗腦，之後又唔記得係粗口，一陣唔小心講咗就弊啦。」原來Gin平日在家會不停看劇集及港產片，外出工作就逼自己以廣東話與工作人員溝通。
Gin的廣東EP於本月尾推出，故她近日十分緊張，她說：「我好希望大家可以聽得出我好用心唱，而且我好想公司下次會畀機會我出一隻發燒碟，不過發燒碟嘅成本好高。同埋我最想就係演出音樂劇，自己都好鍾意演戲，但係叫我去參與電影嘅演出我又唔夠膽。」
同Mag互相支持
此外，Gin早前膽粗粗要求師兄周國賢（Endy）為她寫歌，她表示：「Endy真係好好人，會教我好多嘢、成日同我傾偈，我仲邀請佢幫我寫歌。」Gin曾於《超級巨聲2》踢館，之後她與林欣彤（Mag）成為好朋友，Gin說：「Mag同我都係新人，大家都有互相鼓勵，佢出碟我第一時間去買碟支持，佢算係我香港第一個好朋友，希望之後有機會同佢合作。」
採訪：李珮洳
攝影：陳順禎
化妝：ChrisWong
髮型：Eve(TheLuxe)
