紐卡素以聖占士公園球場作為主場已經有119年歷史，球會失驚無神喺星期三突然將球場改咗名做SportsDirectArena，目的不外乎係為錢。紐卡素喺季初踢得順風順水，班主艾殊利偏偏喺球隊魔鬼賽程前鬼鬼鼠鼠搞小動作，當旺去拆招牌實在棹忌。
聖占士公園呢個名對紐卡素球迷意義重大，球隊由1892年開始就一直用呢個球場，經過多年發展之後家可以容納52,000人，係英格蘭數一數二規模最大嘅球場。眼見阿仙奴同曼城近年都透過出售球場冠名權賺巨額贊助費，一啲細規模嘅球會好似保頓、侯城同韋根等，主場名都同贊助商有掛鉤，紐卡素都唔放過賺錢機會。
球場改名SportsDirectArena
紐卡素今次做法都好小家，球場改咗名做SportsDirectArena，而SportsDirect正係屬於班主艾殊利旗下嘅公司。紐卡素球會話轉名係暫時性措施，係要「畀贊助商一個睇辦機會，睇下有冇興趣嚟投資。」班主艾殊利喺07年入主紐卡素，佢早年開運動用品公司起家，之後靠買賣公司發大達。做咗紐卡素班主之後，艾殊利初期表現都好親民，不時同球迷坐埋一齊睇波，不過生意人始終都係要向錢看，幾年嚟喺紐卡素投資咗唔少錢，趁家隊波好景自然想搵番一筆。
紐卡素球會主席林比亞斯對於有關做法解釋話：「阿巴莫域治有錢過上帝，但係車路士都打史丹福橋球場主意去賺更多錢。我哋今季成績好，要保持落去就唔可以放過任何賺錢加強競爭力嘅機會，因為足球根本係一個昂貴嘅遊戲。我相信每年可以靠冠名權賺1,000萬鎊，每季買多一個人。」
頭號粉絲：不如換埋紅白衫
林比亞斯咁講都係無可厚非，不過要將一個有119年歷史嘅名字抹走，班紐卡素球迷唔將肥佬班主恨之入骨就假。前英格蘭板球員、紐卡素頭號粉絲夏美臣，話今次改名行為簡直係侮辱：「球場改名，同將紐卡素球衣改為紅白間條（死對頭新特蘭）冇分別。」。再講紐卡素喺今季季初成績咁好，踢到家都仲係保持不敗，無啦啦將地頭改名唔知會唔會打窒咗道氣。雖知道紐卡素喺國際賽期之後硬仗連場，呢次突然拆招牌真係唔知會唔會對球隊有影響。
紐記考驗殺到
紐卡素喺今季英超季初表現眼前一亮，除咗榜首曼城之外得番佢哋仲保持清白之身，暫時排喺第3位。不過其實紐卡素既真正考驗仲未開始。開季到家紐卡素最難踢嘅兩場比賽係主場對阿仙奴同埋熱刺，兩場波都係和局收場。到國際賽之後紐卡素就作客對住曼城，之後又要作客曼聯同主場迎戰車路士，連續3場英超都係硬嘢，係咪真係咁有黑馬本色，睇埋佢哋過3關自然有進一步啟示。
