新婚一個月的郭羨妮，昨日帶住幸福和快樂返港出席護膚品牌活動掘金。朱太郭羨妮表示不會定居內地，繼續香港、內地兩邊走搵真銀，同時不忘造人大計，恨生仔恨到不得了，37歲的她笑說：「呢個都好緊要，唔可以遲㗎！」
郭羨妮返內地賺人仔，還賺了一個老公，她形容婚後感覺穩定，又成熟了不少，這段時間覺得很開心，是一生中最幸福的時候，37歲的郭羨妮急於結婚，一定是趕生仔，昨日她在金鐘出席瑞士護膚品牌活動時說：「努力緊，不過我哋兩個都忙，大家都要開工，我就好少探佢班，我唔想周圍走，不過佢會嚟搵我，家一切順其自然，我都知造人大計緊要，係唔可以遲！」
郭羨妮唔補請飲
問郭羨妮會否在港補擺喜酒？她說：「我怕煩都唔會搞，不過會一齊見吓朋友。」提到郭羨妮公開表明自己明年才結婚，欺騙了全世界，有沒有朋友向她投訴？她說：「冇呀，佢哋知我好低調，都送上祝福，我結婚前一日都拍緊戲，第二日先飛關島，就好似拍咗場結婚戲咁，係好秘密咁進行。」
另外，新任媽咪余思敏（Sammie）昨日於銅鑼灣為有線楊天命節目任嘉賓，她表示都會請教師傅詢問老公鄭中基及囡囡的健康，她說：「咁身體健康順利好緊要，佢要賺奶粉錢嘛。」
鄭中基想追多個
Sammie表示老公目前於內地拍戲，非常掛念囡囡，她說：「佢好掛住個女，我日日不斷send相畀佢睇，佢都會打返嚟問飲咗奶未同瞓咗未。」
Sammie表示亦與老公商量過再追多個，她坦言：「都會㗎，不過家唞吓先，佢都想追，不過就唔趕囉，佢話仔女都冇所謂，最緊要健康聽話。」Sammie更抱怨囡囡對老公比對自己好，皆因她每次抱囡囡便喊。
採訪、攝影：楊潔雯、王崇穎