愛得起外形出眾的AudiTT，怎樣看都不屬低調一族，越浮誇就越對胃口，如果連招牌火紅都嫌不夠喉，今次原廠的新搞作相信可滿足你！車廠趁冬天殺到，唔玩熱情玩冷靜，純白純銀純黑都要變啞，搶眼程度令你啞口無言。
記者：趙慧敏
攝影：譚盈傑
Model:Rika@GME
冷冷觸感
未知是品牌效應還是宣傳攻勢，總之AudiTT早就成為潮人指標，公子哥兒揸架TT出巡，引起途人注目禮先叫成功，不過貪新鮮永遠是公子哥兒的本性，衫都要轉季，又何況愛驅！今次由廠方打造的冬日版啞色系列，踢走夏日陽光味，換來多點Cool味，同冷冰冰天氣一樣絕襯。
雖然今次大玩換妝效果，不過原廠工藝當然比山寨貨高幾班，這款啞銀版TTCoupe2.0TFSI就帶來完美演繹！在銀色車身鋪上一層啞面，親手觸摸，比一般光面帶來不一樣的冷酷觸感。不過老實講，淨啞銀一樣有人嫌單調，所以側鏡及尾翼就換上啞黑，令外形睇落更標青出眾。此外，細微位上都可以見到啞色蹤影，車尾的Audi啞黑標誌為這款當家跑車添加動感。
極速超穩定
如果硬要將TT定性，它必然歸類為年輕人心目中首部夢想號跑車，除價錢比一些天價跑車更接近現實外，造型充滿Young味當然是主因，車身線條簡單利落，配上一對Xenon頭燈，就好似向途人放電一樣。TT的車身採用ASF概念高鋼性結構，配搭ESP行車動態穩定系統以及ASR循迹防滑系統，極速行駛時提供極高穩定性。
內櫳亦充份發揮年輕人及女士最愛嘅圓碌碌配搭，無論波棍台、空調出口都以圓形為主調，難怪TT冧盡男士，更加是唔少女士的DreamCar。
TTCoupe2.0TFSI
引擎：1,984cc直四
馬力：211bhp/4,300-6,000rpm
扭力：350Nm/1,600-4,200rpm
傳動：6速Stronic
售價：$516,824起
查詢：25281862（合迪汽車）