早年同富婆拍拖嘅「風風」，曾經因為精神出現問題而搞到滿城風雨，好在佢康復後獲得「大間」重用，搵佢重出江湖繼續靠把聲搵食。不過，聽聞風風做咗無幾耐，佢個節目又突然停播，最後仲調咗風風去訓練新人。
關仁打探之下，原來係同風風過份hardsell自己有關。聽聞佢做節目時，猛讀自己以前寫畀人嘅情信，有時佢又興起唱京劇，仲係冇音樂墊底清唱嗰種。仲有係風風又成日播自己以前錄低嘅歌，由於嗰啲聲帶有部份係現場收音，質素好差，有違大間講靚聲嘅宗旨，所以大間即時喊停，暫時調風風做其他工作，等佢冷靜吓之後再安排新時段畀佢做。
撰文：關仁