上個禮拜，俾駁通英意球壇嘅「視而不見大大」話我係球壇變色龍乜乜物物；實情係咁，你睇得波經，我話邊隊幫你贏到錢就係你嘅飛佛，你認唔認同？好，今個星期就齋同你講賭。
由於藍鑽石前輩離開波經戰線，我呢個半桶水所謂名家，間唔時都會客串貼吓英超同意甲；雖說我上星期符碌中咗曼聯小勝，但貼英超，始終都唔係戰鬥員A同青蛙仔嗰皮，不過講到意甲，都叫冇丟同我一樣係意大利躉、AC躉嘅藍鑽石嘅架。
意甲唔好睇、你唔睇，係一件事；意甲好唔好賭，又係另一件事；舉個例，意甲追反底你死硬，好似切塞納咁，上個星期對住萊切諗住開齋，點知主場都係要俾人切（我冇貼切塞納），贏一次都唔夠你死！
提防儍豹主場搞事
再嚟同你講球隊屬性。意甲啲波，好多隊都好有style，好似巴勒莫，呢隊波出名作客屎，不過南部主場真係唔講得笑，今季又贏到盡，不過以我睇意甲嘅經驗，儍豹有時真係假假哋，年年總有一兩場主場輸得好騎呢；不過最經典都係北部嘅熱拿亞，N年前試過同卡利亞里喺9分鐘內入5球，呢兩隊主場，要小心度過先好落飛，始終意甲，易假。
又有人話意甲悶波成日開「細」，我話你都儍，係睇你識唔識捉嘅啫；今季捉AC、羅馬同路華拿都執唔少啦，睇準啲，一嘢隊落去，咁咪養全家囉。
有個朋友同我講過，你賭得掂意甲，你就識賭全世界嘅波，我覺得兩睇啦，不過你畀我揀，4大聯賽我就比較鍾意玩意甲喇。
純粹分享，不喜勿插。
文：守丹