許冠英前日突然去世，令不少圈中好友傷心不已，廖碧兒昨日更淚如泉湧。
廖碧兒：我同懷欣同懷谷熟，收到呢個message好唔開心。我當佢係uncle，佢屋企人好錫我，我同Sam合作演唱會後會食飯，許冠英連結他都會送埋畀我，佢係開心果，成日同我講時裝。
林建明：佢同我、米雪、傅聲都係邵氏訓練班同學，真係好突然，同佢friend，以前返學睇佢媾女、戀愛、拍拖，好幸福好似《那些年》。好難過，好彩話佢走時好安詳。
丘亞葵：我幾年冇見佢，佢一向好健康，唔煙唔酒。
呂珊：聽到呢個消息好傷心、好唔開心，佢為人好風趣好幽默，本來嚟緊我哋仲有好多合作。
李麗霞（黑妹）：佢份人好樂觀，一行出嚟已經令到身邊人笑晒。
梁漢文：同老婆拍拖時睇第一套戲就係睇《半斤八両》，仲記得老婆笑到抱住個肚，所以我同老婆其中一個回憶片段都係因為佢。