馮仁昭四圍超：
鄧梓峰X巴斯光年　爺孫賣童真 - 馮仁昭

馮仁昭噚日去咗旺角Bossini《反斗奇兵》活動，主要係捧巴斯光年兩爺孫場，咪就係16歲卡通版巴斯光年，同51歲真人版巴斯光年鄧梓峰囉！阿爺鄧梓峰喺1960年出世，巴斯光年就喺1995年5月26日美國迪士尼出世。鄧梓峰同「孫仔」玩crossover，做活動司儀，天后容祖兒就以代言人身份扮活潑「翠絲」，同場仲有謝婷婷，眾人齊齊賣童真。

仔女都話似

巴斯光年嗰樣同鄧梓峰激似，面形、笑容同眼神都一模一樣，年前鄧梓峰就俾網友惡搞，話佢同巴斯光年咁似，取笑佢哋其實係兩爺孫。
噚日馮仁昭同鄧梓峰喺電話講番俾網友惡搞呢件事，鄧梓峰話得啖笑，仲話唔覺自己似巴斯光年，不過就連佢啲仔女都話似。另外，祖兒話今年係佢入行以來最童真嘅一年，馮仁昭問佢嘅童真價幾高、身家過億未？祖兒即刻話所有錢都畀晒媽咪，佢就只得幾百蚊人工。