鄭秀文（Sammi）自從今年3月同許志安翻撻後，每次出嚟都甜到漏，之前佢仲同安仔靜雞雞去咗日本旅行，唔知係唔係預支蜜月？噚日Sammi晨咁早就去迪士尼參加慈善步行籌款，由於天后駕到，大會安排消防員義工團體喺現場維持秩序，但反而令場面更混亂，搞到Sammi好尷尬。
皆因冇化妝
前晚喺日本返港嘅Sammi否認預支蜜月，仲話係情侶間嘅正常相處，希望大家唔會放大件事，佢話：「唔好睇得我哋過份甜蜜，我真係未有婚姻計劃，未有打算結婚。」不過佢解釋喺機場表現，係因為冇化妝，加上頭髮扁晒，佢怕上鏡唔好睇啫。
此外，提到近日陳冠希又再爆淫照，曾經同佢合作嘅Sammi就劃清界線話同佢唔係好熟，又話安仔唔會叫佢影親密照，更自嘲話：「除非我身材好啲，家影張A4紙咪得囉，我冇呢個傾向同埋我好保守。」