正所謂一命二運三風水，投啱胎唔單止贏在起跑線，連成長路都萬千寵愛集一身；好似嫁畀香港富豪四叔愛兒嘅千億新抱，早前幫囝囝搞個百日派對，就用馬戲班做主題。曼聯前鋒朗尼，同老婆高蓮財力未及得上李家，但都好有心思，喺利物浦市book咗個農場，為Kai仔兩歲生日搞個農場派對。
農場內侍應扮牛牛
Kai仔上星期三踏入兩歲，不過爸爸要比賽兼要賀費Sir執教25周年，所以生日派對延至禮拜日舉行，高蓮一早返到利物浦市部署，訂咗安樹賽馬場，特登搭建兩個大帳篷，搞到成個小型動物園咁，安排好多兔仔、羊仔、馬仔同美洲駱駝一大群可愛動物；連場內嘅侍應都要穿上牛牛裝，又用汽球扭成一架架拖拉車，會場更掛上大型橫額，寫上「WelcometoKai'sBirthdayFunFarm」。
大約100個賓客參加Kai仔生日會，有老有幼穿梭呢個Kai仔農場，有小妹妹着到成個白雪公主咁；而高蓮都怕大人悶，安排咗DJ現場播歌，又玩集體遊戲，到接近天黑，會場就用投影機播放「Thankyouforsharingmyspecialday.LoveKai.」（多謝你們與我分享特別的一天）字句，代表Kai向出席嘅嘉賓致謝。
今次朗尼同高蓮就冇透露，生日會用咗幾多錢；不過以上年Kai仔第一個生日會，高蓮係迪士尼搞，足足花咗9萬鎊（約114萬港元），今次睇嚟都唔少錢。朗尼兩公婆之後喺Twitter晒命，朗尼就話：「喺囝囝生日會中過了美好嘅一日，佢好鍾意。」高蓮就話：「完美嘅一日，每個小孩都樂透了！」我求大俠就心諗，Kai仔第1、2個生日會都咁豪華咁新鮮，以後幾年生日會要再搞新花臣，睇嚟高蓮都有排煩嘞！