鄭丹瑞（阿旦）同林珊珊最近喺紅館搞「三十小神仙吹唱會」，紀念佢哋同前港台DJ何嘉麗主持嘅港台經典節目《三個小神仙》30周年。其實今年亦係港台第二台30周年，除咗《三個小神仙》外，《晨光第一線》同《輕談淺唱不夜天》等都好經典。為咗紀念30周年，港台最近搞咗一系列「二台三十年RadioMagic」特備節目，由現時港台DJ李志剛邀請一班新舊主持一齊吹水懷緬過去。
寸Juno要整容
李志剛日前同蘭子及周國豐錄特備節目，周國豐大爆當年每次請黎明做嘉賓，蘭子一定請病假，追問蘭子係咪同黎明拍過拖，但蘭子死口話冇，佢話：「我只係對佢有好感，以前同黎明登台合唱，佢好細心做口形提我歌詞。」之後蘭子又自爆當年訪問麥浚龍（Juno）時激嬲咗佢，蘭子話：「我第一句就問佢有冇諗過整容，佢有啲嬲！」
另外，李志剛日前同蔡楓華錄音，除咗一齊唱歌吹水外，蔡楓華仲大讚李志剛係家港台最紅嘅DJ㖭。