上星期五康師傅（322）宣佈合併百事可樂中國業務，兩強聯手，擺明係想單挑王者可口可樂。唔講唔知，原來呢單大龍鳳已經籌備咗好耐，康師傅董事長魏應州日前接受台灣媒體訪問時就話，雙方喺09年就已經開始傾結盟，只係呢項合作規模實在太大喇，所以一搞就搞咗兩年。魏應州亦講明，佢心中有個「超越可口可樂」嘅目標，呢個大衞似乎唔拉倒巨人哥利亞唔會罷休咁款。
簽約儀式當日，百事可樂董事長兼執行官盧英德，仲好肉麻咁同魏應州講：「我們家有個小孩（百事可樂中國），託你照顧了！」同樣係『佬』一個嘅魏應州即刻『攬上身』：「這個責任相當大，絕對會全力以赴！」華華真係有啲毛管戙！
講開又講，呢次合作成唔成功，仲要睇過唔過到內地當局嘅反壟斷審查。不過據接近康師傅嘅朋友講，康師傅今次藉換股方式，拎到百事可樂大陸嘅生產同經銷權，交易完成後，話事嘅仍然係持大股嘅康師傅，基本上唔違反官方保護本土品牌嘅思維，仲某程度上可以削弱可口可樂嘅優勢，所以佢哋話對通過審查都幾有信心咁話喎！