SONY平板唔呆板　一摺變梳妝盒

有別於iPhone，iPad男女用家比例，肯定側重於男性！鬼咩，又大又重，女士們點擺落手袋呀？SONY為搶佔女仔平板市場，最新嘅TabletP，索性靚芒一開二，摺埋成個梳妝盒咁，又輕又美觀，跟當年老任NDS攻佔女性Market，有着異曲同工之妙！

記者：許福合
攝影：蔡家輝
Model：Winkie@PureModels

罕見換電設計

早前SONY已經在香港推出TabletS，但除了幾個自家App外，新意平平，所以唔少Fans都將眼光放在這部咁摺得嘅TabletP，暫時行貨未有聲氣，而水貨價位有上升趨勢，現時報價大約$6,080。其實TabletP不知道還可不可以叫做平板，擁有上下兩個5.5吋輕觸式屏幕，唔用時可學似NDS咁摺起，而且機身質感比起TabletS好得多，而重量就只有372g，連續使用仲長達7.5小時，覺得時間短的話，唔緊要，P仲可以換電，是Tablet中相當罕見嘅設計。

■罕見使用換電設計，約可使用7.5小時。

■同樣係雙芒摺機，外形真係有幾分相似。

■拉直機身變回平板，仍然比iPad2細部得多。

Apps雙芒優化

當合上機身，P就好像一個女士手袋一樣，不過別以為硬件會較弱，處理器就用上雙核的NVIDIATegra2，有511萬像素Exmor鏡頭，具備3G及WiFi網絡，使用Android3.2，除咗Android內附各種App外，亦會跟TabletS一樣，會內置有SONY自家設計Apps，當中最值得留意係具備PlayStationCertified認證，可以下載PS遊戲玩！而且因應雙芒應用，SONY自家App都會為雙芒優化，令到上下芒可作不同顯示及用途，有如NDS。其中一個例子係玩PS遊戲時上芒會顯示遊戲畫面，而下芒就會有方向、三角等操控鍵，不過奇怪係LR掣放了在上芒，所以要出動埋食指先夠用！至於原生或未支援雙芒的Apps，就會將畫面一開二，分別在上下芒顯示，若果網頁相片或影片剛好在中間，要先上下移動才睇得晒！