日前行開商場隨手攞咗本免費雜誌「讀書好」，睇咗鮑彤個仔鮑樸訪問，講佢點樣打開在香港出版「禁書」呢門生意，好有趣。鮑彤乃趙紫陽左右手，六四之後同趙命運一樣被軟禁。趙死後有人將他口述錄音交鮑樸在香港出版，成為暢銷書。
原來自由行其中一樣受歡迎手信唔止SKII、「禁書」亦好受精英階層歡迎，尤以送官員做禮物。機場書店當眼位全部擺放呢類政治禁書，銅鑼灣、尖沙嘴自由行旺區書報攤亦擺滿禁書。
但呢個市場良莠不齊，有走八卦路線，扮有內幕，實質上網東抄西抄而成。禁書定價也偏貴，售價多過百元，邊際利潤頗高。鮑樸本是海歸，在香港做管理顧問，近年全職出版禁書，成為一門生意。
政治禁書 自由行手信
香港呢類政治觀察及八卦在內地一直有市場，幾本主打內地政治評論及八卦雜誌用低成本運作，多年屹立不倒，又少廣告收入，就係靠帶入內地，淨靠賣書足夠生存。鮑樸話佢自己細細個已睇《天天日報》及《七十年代》雜誌（後改名為九十年代）。
其實港媒對內地政治有影響力，因內地也有權鬥要放風，又冇腳影捉，最好係出口轉內銷，先在港媒炒熱，再傳回內地，以增加可信性。97以前《信報》也常有內地堅料，也是得益於內地權鬥出口轉內銷策略。
由此觀之，有人在《多維月刊》放料抹黑振英毫不奇怪，目的不止要令本地傳媒跟進炒作一番，亦有轉內銷考慮，令京官也關注振英的私生活。
香港傳媒大亨只知燒銀紙，搞免費報紙一日就燒幾十萬，本大利小。從政治投資角度，用搞免費報紙投資「零頭」，足以搞本似模似樣內地政論雜誌，無形回報肯定高，本小利大，化算之極。鮑樸出版社出版「邱會作回憶錄」，本地無人問津，也不認識邱會作，但添馬艦解放軍總部軍官卻人人手執一本。香港人生意頭腦夠靈活，惟獨一講到政治，就全部啞晒，睇嚟香港人始終都係唔識搞政治。
添馬男