四叔李兆基曝光率高，又鍾意同傳媒傾偈，每次出席公開場合都謀殺唔少菲林。早就慣晒面對大場面同閃光燈嘅四叔其實非常貪靚，之不過佢同一般模唔同，華華發覺佢好緊張個頭，仲周不時會叫人出手相助。
上個禮拜五，四叔出席復旦大學校董就職典禮，就見到恒地（012）大公關Bonnie幫手指導點樣同四叔梳頭，搞兩搞就靚仔晒，難怪四叔笑到咁開心。Bonnie除咗公關技巧一流，似乎梳頭都好耍家，點解華華咁講？皆因舊年Bonnie都有喺公開場合幫過四叔梳頭，又係一梳就靚仔晒嗰隻……
除咗叫人出手，四叔都會自己落手落腳扮吓靚，前年華華嘅同事就影到四叔自己梳頭，感覺就好似《阿飛正傳》最尾一幕梁朝偉咁型。至於點解嗰次Bonnie冇出手？唔係佢失職，只係因為嗰度其實係男廁嚟啫。