希臘又話唔搞公投，加上歐洲央行突然減息刺激經濟，港股上周五大升600點，完全收復上周四嘅失地。不過，後市要再上一層樓並唔係易事，因為歐債危機仍然未除，一方面希臘各黨就籌組新政府出現爭拗，而G20峯會喺IMF增資問題上亦未有共識。
後市有機會先行整固，揀股可考慮有業績支持嘅中資股，中國建材（3323）首9個月賺59.8億人仔，按年爆升2.8倍，就算第四季冇錢賺，PE都只係7.8倍，比起另一龍頭安徽海螺（914）預測PE10倍仲要低，實在抵到爛。阿爺隨時開水喉，基建項目上馬，中建材肯定受惠。
中建材上周五收報10.68元，升4.1%，由10月初低位計，累積升幅已達94%，9RSI亦升至83的超買水平，短線不排除要先回氣，戰友可候10元樓下吸納，中線上望13元，屆時預測市盈率亦僅7.2倍，跌穿9元止蝕。
唐牛