保利達（208）澳門東方明珠區土儲，隱藏價值一釋放，發光發亮。保利達持有呢個地段土儲，應佔總建築面積高達782萬平方呎。而呢組臨海地皮，毗鄰港珠澳大橋落腳點，地理位置靚絕。呢幾年馬交娛樂、旅業暢旺，支持資產價格起飛，相信保利達呢組地皮，未起樓，亦已經大賺地價。又今年初，地段豪華商、住項目，亦都獲建築圖則批准，即係話，項目進一步價值，可以喺未來幾年釋放。保利達現價0.71元，又係海嘯低殘價，相對重秤前NAV2.34元，已經大幅折讓70%。將馬交項目每方呎增值1000蚊咁大把，保利達NAV都增值78億銀，NAV擴大到4.1元，折讓83%，漲漏口水。中線收集博保利達翻一番到1.4元，折讓仍然高達66%。
時富金融追落後
時富金融（510）喺呢期先開始起步嘅金融證券股，超級落後。而集團現價0.158元，又係貼住海嘯價，NAV折讓35%。仲要咁睇，時富家陣經營緊嘅家居零售業「實惠」，有透過資本市場反映身價嘅潛在可能，時富家底，亦有水漲船高效應，NAV折讓，唔止呢個數。呢轉短打，博時富升20%到0.19元，仲未有耐上到NAV。
錢雋