一年一度嘅安永中國企業家獎又公佈賽果喇，睇返過往幾年嘅得獎者，個個都有番咁上下份量，名單中仲梗有一、兩個係來自香港，兼且一講出口，身在金魚缸中嘅你一定知曉！
榮獲安永企業家獎
好似前年就有「上海姑爺」羅康瑞，舊年就係「電訊魔童」王維基，咁今年又有邊位本地薑榜上有名呢？登登登凳，就係專賺女人錢嘅卓悅控股（653）主席葉俊亨喇。
葉俊亨除咗賣化妝品同日本奶粉賣到出晒名之外，佢最響朵嘅，當然係投資有道啦！華華不時都聽到唔少有關佢炒舖嘅小道消息，仲好過賺自由行啲人仔啦！
除咗地產市場眼光獨到之外，喺資本市場操作，葉博士亦非常之咁熟手。就上個禮拜三之嘛，葉俊亨同老婆齊齊以每股1.3元，大手減持7800萬股卓悅股份，套現成1億元；不過睇番9月，卓悅啱啱先至五度回購股份合共900萬股，每股平均價都係1.08元至1.3元左右。公司一出手托價冇幾耐，大股東就減持抽水，華華覺得呢招認真「卓越」，葉博士攞獎當真實至名歸！
李華華
mailto:[email protected]