人物專訪
「759阿信屋」因定價太低被供應商停止供應可樂，市民發起「罷飲可樂大行動」支持這間賣平貨的零售店，老闆林偉駿頓時變成網絡大紅人，他坦言沒想過報章和網絡的力量這麼強大，「其實我唔係撩事鬥非，只係想安守本業。」記者：陳新政
林偉駿另一身份，就是經營主要從事生產及銷售線圈及電容器等電子零件的CEC國際（759）主席，CEC上市時，林偉駿雄心萬丈，他在招股書上曾說過公司業務每年要保持10%增長，公司的確每年都在擴充，生意額最高峯時曾接近10億元，可惜08年一個金融海嘯，像一盆冷水照頭淋，他要大刀闊斧裁員3000人，才能保住公司，令餘下5000人繼續有飯吃。此打擊太大，更令他不再冒險，「守住本業就算，夾硬谷起冇意思，唔想經濟一差又裁員。」
現年52歲的林偉駿不再攻只願守，與他近40年開廠經驗有密切關係。林偉駿白手興家，13歲小學畢業後入工廠打工，21歲被人游說下，自己開始接生意來做，每張定單幾千至一萬元，「80年代香港好難請人，人工成600蚊一個月，大陸只係70蚊，每日就坐漁船運貨返大陸加工，再運返嚟賣，慢慢咁做落去。」
自己並非做爛市
生意開始做大，林偉駿膽粗粗拿着3萬元走上中山開廠，專造線圈等零件，但當時已有很多大廠對手，要生存只能鬥平賣，「人哋賣3個半，我就賣平1蚊，結果被行家投訴破壞行規。不過對方只有兩種方法，一係打低你，一係同你合作。」結果大廠TOKO做了CEC國際股東。林偉駿認為自己並非做爛市，公司貨品有質素才有市場，諸如SONY及CANON等大牌子，都是他的客仔。
不過，現實世界除了有實力亦要照顧江湖地位，CEC國際在線圈界仍然是小角色，SONY及CANON的貨源仍要依靠其他大公司，為令每位供貨者安心，他們要靜雞雞問CEC國際要貨，「佢哋（SONY及CANON）唔會得罪大廠，但一直都背後向我攞好多貨，證明我啲貨有質素！」08年一個金融海嘯，險些淹沒這位小廠家，林偉駿憶述時，仍嘆指「打擊實在太大，好彩當時公司冇乜借貸，冇夾硬谷大市場。呢次教訓我，做嘢冇得充大頭鬼。」
經過慘痛教訓，林偉駿變得更加審慎，廠房有空餘產能都不敢用盡，「而家每年有6、7億元生意就夠。」他指工廠越來越難撈，內地工資明年又加20%，毛利不斷受壓，只能自行研發技術，控制成本。他坦言以員工第一，股東反而只是其次，「其實間公司有冧巴，好似冇冧巴咁，上市公司做到咁都幾慘，但我唔想再冒險，要保住班夥計嘅飯碗。」
良心老闆難做，大陸生意更難做，林偉駿指自己不擅交際，沒想過打入內地龐大市場，淨係應酬都頂唔順。
林偉駿與本港不少廠佬一樣，將閒錢投資地產，在CEC國際年報中，不難發現其手持住宅與工廈物業，林偉駿只簡單說，是投資而已，不過，今後不會再買住宅。至於公司大本營興運工業大廈（現已持有六成業權），「只會買多啲觀塘棟大廈業權嚟自用。」
明年7月殺入屋邨
林偉駿坦言「759阿信屋」是他最後的投資，「中山東鳳鎮廠房塊地有無敵海景，政府經常叫我起樓，但我唔會掂其他生意啦。」的確，由於「759阿信屋」只成立15個月，未夠2年資格做房協租客，到明年7月，「759阿信屋」勢要殺入屋邨，到時林偉駿有排忙。
林偉駿小檔案
‧CEC國際主席、董事總經理及執行董事
‧13歲小學畢業後開始入工廠打工
‧21歲在中山開廠，並創立CEC國際
‧去年7月創辦連鎖零售食品店「759阿信屋」