撞牆，在足球世界裏是一個何等賞心樂事的字眼，你畀波我，我畀番個波你，一來一往之間就輕易將討厭的對手擺脫了，妙，但同一個字眼在跑步行家眼中，卻是敬而遠之的痛苦經歷，但唔想佢嚟，佢還是會嚟，避也避不了。
跑步撞牆，是為當你運動量增加時，氧氣來不及供應消耗所需，身體於是會自動啟動無氧系統──分解碳水化合物，搞掂？邊有咁着數吖，與此同時，副產品名叫乳酸大量送到，於是就造成呼吸急促，肌肉疲勞呢堆衰嘢嘞（有講錯請雷博士指正）！
撞牆就係如此這般的一件衰嘢，但佢過癮之處，係佢並不是跑友的結局，而只是其中一段必經過程。係人都知，只要你捱得過呢段黑暗的撞牆之旅，慢慢血液流通回復暢順，痛苦減退肌肉放鬆，呼吸終於順番晒時，嗰種茅塞頓開的感覺，非但筆墨難以形容，靠把口都講唔清楚，只有用腳跑過才能感同身受。
撞牆期是令到跑友們學識獨立，自己顧自己的時刻，皆因人人身體及能力不同，越久經訓練的，自然可以將撞牆期延得越遲，兼縮得越短。人生不如意事十常八九，跑步仲堅，除非「hea」跑，否則十成十會撞牆，呢個亦都係為何運動令人開朗，因為大家都明白煩惱避唔到，但痛苦好快無，只要肯咬實牙關，怨少兩句，行多兩步。
運動令人開朗，我甚至認為撞牆令人天真！當你處身其中天旋地轉之際，生理上已經處於痛苦極限時，心理上當然要為自己打開一扇窗口，我相信無人咁笨仲會為自己百上加斤，火上加油去諗自己身上的痛苦吧。你記得對上一次去睇牙醫的經驗嗎？洗牙事小，剝牙事大，當你擘大個口，眼淚水都就快「標」出來時，你諗緊乜？我？我通常都會偷偷地睇吓護士姑娘靚唔靚，就算唔係咁美艷，響剝牙個一刻，我都會當佢係天仙一樣，幻想一番……
之前提過的台灣跑手林義傑，佢就回憶說過能夠捱過一次又一次的超長跑，就是靠腦海中浮現了一罐可樂。一個非常低微的要求，再加上一點超現實的幻想力，撞牆的所謂難關，就自然迎刃而解！天真，真好。
文：keyman