英超餅仔越搓越大，水漲船高，比賽更好睇，「大」show比率暫時史上新高。新興曼城放領，群雄着急，恐被放甩；借國際賽期短暫停火前，先埋好盤數交代，才享受假期，今天料熱門佔盡上風，捧阿仙奴及曼聯「大」炒。
看意甲A米、德甲拜仁及西甲皇馬、巴塞的雄風，無論從欣賞及投注角度，始終難與英超比擬，尤以西甲，自莊家不時調高雙雄比賽的「大細」中位數至3.5球後，開「大」比率自是急降，好分都冇用。翻查皇馬及巴塞過去3場聯賽，共錄得5勝1和，但當中竟然有5場波的半場及全場比數不變，超晒班，點到即止，不多費分毫體力；看官見上半場早定勝負，扭台或蒙頭大睡足矣。但輸得最甘，應是巴塞主場和西維爾0:0，莊家贏一鋪唔怕派廿鋪；長捧呢類霸主，冇着數。
有時周末茫茫百多場波盤，波友總不想單為贏錢，千挑萬選揀場入球「細」，全場喊頂住咁冇癮；所以看到曼聯炸兵工廠，曼城又炒曼聯，阿仙奴反勝車仔，無論你是邊隊擁躉，也會動容；捧走地入球「大」，也收錢收到手軟。實非偶然戰況，據足智彩統計，英超暫開「大」比率非但是4大聯賽之首，更高達58%，暫創英超開盤以來新高。
今天賭友節目多，周六少有跑泥草日馬、黃昏有亞冠盃決賽，本來可高高興興食個晚飯，迎接今年最後一個國際賽前的英超盛況；可惜編場大員失策，沒有照顧地球村英超躉需要，竟將本輪英超最好戲碼，全塞進晚上11:00時段，家中得一個解碼器的球迷頭痛了，知有波入，都轉唔切台。
群雄興大炒，今晚可向阿仙奴及曼聯主場戰西布朗及新特蘭埋手；前者上仗雖只能與馬賽互交白卷，但與季初比較，確認氣勢及球賽節奏俱尋回了，也不得不服未續約的尹佩斯着晒火，帶起球隊翻身。西軍也確認今季在護級打滾，今更缺前後主將沙恩朗及舒卓拿，當黑對當旺，注定冇運行。至於曼聯迎新特蘭，一隊遇二隊，曼聯要追數，難報對手季前接收殘兵奧沙及布朗等之恩，勒住贏；用仔打中場，加快進攻節奏，新特蘭班老兵擋唔住。
下次見報（11/11）
蘋果波神
今日重心推介
熱選
阿仙奴勝[-1]（1.97）
冷選
曼聯勝4:1（13）、5:1（22）