好多人恥笑俗稱「區佬」嘅區議員專做通坑渠、換燈膽呢啲瑣瑣碎碎工作，平日最叻用蛇齋餅糉小恩小惠收買人心，初次出征區選嘅新民黨搞新意思，有個出選屯門嘅候選人，佢份政綱突破蛇齋餅糉呢四大法寶，十分另類。
新民黨嘅地區政綱，竟然包括建議開設交友中心，讓居民擴大生活圈子，幫助適婚人士尋找伴侶。統計處做過調查，屯門區單身男女人口比例與全港平均水平差唔多，即唔係特別多剩男剩女，新民黨呢個建議唔知有冇市場。
八方記得特首曾蔭權鼓勵香港人生仔，仲要生夠三個，新民黨仲犀利，想做埋媒人，呢個政綱仲「偉大」過選特首，至於做媒人包唔包生仔，新民黨冇承諾，交友中心若果撮合咗怨偶，會唔會負責箍煲或者做和事老，冇講。