94年諾貝爾經濟學獎得主約翰．納殊（JohnNash），近日再臨香港，據講舟車勞頓都幾攰，無四出觀光，噚日去拔萃女書院，同來自82間學校嘅600個學生對話，講吓經濟同研究心得。
經濟學大師年屆83歲，係博弈論權威，席間被問到對家全球經濟不穩嘅睇法，佢話經濟有起有落，家係循環當中嘅一點，08年金融海嘯產生嘅恐慌情緒影響至今，令股票市場咁波動，至於幾時先至擺得平，大師無答案。
學生面對大師都幾踴躍提問，有學生問佢何來動力做研究，佢講笑話唔知，「心理學我唔識喎，我係讀數同經濟」。據說JohnNash當年唔使點讀書，係無師自通成為博弈權威，有學生問佢當中秘訣，話大家誤會晒，天才唔係天生，總之大家應該多讀書，先可以融會貫通做大學問。
納殊下周二到城大接受榮譽博士學位，台灣嘅連戰、立法會主席曾鈺成同中國工程院主席團名譽主席徐匡迪都獲榮譽博士學位。