昨日慨嘆有時運氣不濟，非人力所能挽回，但如果人不知道自己嘅制約，盲目衝刺，就一定冇運行，好似明富環球嗰位JonCorzine，管理明富環球以為自己管緊高盛，夠膽冒大風險，當其他銀行因為「沃爾克規則」（VolckerRule，沃爾克建議不准銀行以自己資金去炒金，只能代客買賣。如銀行擁有私家炒房交易proprietarytrading嘅話，一定要分拆），而開除有關交易員之時，Corzine以為係「機不可失」，連忙招聘呢啲交易員入公司，乘機壯大明富環球嘅炒房，誰知碰上歐債危機，神仙難救。相信經此一役，美國監管機構必定加緊執行VolckerRule，連非銀行嘅證券行/經紀行都唔准炒，以後只有對冲基金可以奉旨炒作。
炒股炒金炒樓炒期貨發達者，大有人在，只可惜炒燶嘅人更多，炒到發而不知收手者，最後亦有可能獵狗終須山上喪，如上述嗰位Corzine本已名成利就，既然去咗政壇搞政治咪好囉，做乜鬼要重返華爾街吖。呢啲事情是否天註定，大家都唔知。一位崇基校友鍾月萍博士話或有天機可測，講吓無妨，信不信由你。佢本已返回美國嘅嘞，但母校崇基學院在十一月十二日在會展有盛大宴會，筵開一百六十席，大量海外校友自海外回港參加，鍾月萍博士係其中之一，既然回港一行，就有有心人捉住佢講易經、河洛理數：
（一）十一月十九日星期六下午三至五時在崇基陳國本樓講「財富、地位、愛情分多少？誰作主？」歡迎中大校友參加，不收費。（二）十一月二十日天地圖書主辦「風水研習班」及十一月二十七日「河洛理數研習班」，時間由上午十一時至晚上七時，中午休息一小時，於MegaBox大眾書局舉行，每位參加者收費六百八十元，可向天地圖書或大眾書店索取報名表格。鍾博士此外還會在尖沙嘴Mariners'Club開班，直至到十二月初為止。
風水玄學之名，因千億爭產案而蒙污，當事人弊在不知己、打官司，章法混亂，輸掉官司後，不知有甚麼公關顧問俾意見，竟然上電視電台係咁講，俾聽眾鬧爆，有如此人在，正統風水理論有發揚必要，以免民眾受人誤導！