趣趣地：調離場除衫無辜被逐

踢波踢到身水身汗，球員被調離場時想嗱嗱臨除衫冲個靚凉，都係人之常情，但黃牌喺身就唔好太早除衫嘞；日前一場烏克蘭超級聯賽，迪尼普作客對卡帕提，迪軍加納中場恩古姆（右）62分鐘被調離場，佢老哥行到場中間就忍唔住除衫，結果球證畀多張黃牌佢，兩黃一紅被逐，由於換人程序未完成，迪尼普要打少一個，好彩都保住勝果贏2:0。