據講，每個人心中都有一個沈佳宜，而每間大學嘅學生，都有一處hea嘅地方，西環德輔道西森記糖水，幾十年嚟都係港大學生食消夜嘅勝地，那些年，不知有幾多男生女生喺度囗糖而戀上了，想當年，八方都不時幫襯，不過最近聽到個消息，地產霸權深入西環，森記被收舖。
CY忽然駕臨
據港大老鬼憶述，森記最初以「盧海鵬」為名做招牌，大約80年代後期改名森記，老闆姓蔡，由於多港大人幫襯，所以同好多港大師生熟絡，學生會、系會搞活動、印特刊，森記都會酌量贊助經費。有個老鬼同八方講，當年食消夜，一班麻甩仔嘅話，多數去水街口金興打冷，大班人食飯就落石塘咀，「媾女先至去森記食糖水。」
港鐵效應令西環大變身，森記舖位月租約2萬蚊，日後搵唔搵到新舖係未知之數，街坊話彭健新、陳啟泰不時幫襯，日前有晚仲見到備選特首嘅梁振英（CY）忽然駕臨食糖水，「架車泊喺門口」。CY細個時住警察宿舍，喺英皇讀書，都算係老街坊。
被收舖消息傳開後，好多人關心森記去向，有傳年底要拉閘，現時只係以短期租約續租舖位，蔡老闆噚日證實業主已通知收舖，不過佢叫八方放心，因為應該仲會做多幾個月生意，「家未知第時點，做埋呢幾個月先至打算。」
森記受歡迎，價錢街坊價係主因，茶葉蛋兩隻6蚊，糖水12、13蚊起有交易，平過同區4至5蚊，蔡老闆有heart亦好重要，親自去果欄買生果做芒果西米露、雜果凉粉，「佢嫌送嚟嗰啲唔靚，寧願自己去揀。」
平民糖水舖做生意貼心，四款甜品最獲街坊客、港大生愛戴，夏天芒果西米露、雜果凉粉係主打，食落透心凉；家11月天氣開始轉凉兼乾燥，老闆推介蓮子杏仁糖水同鮮奶燉蛋白。除咗糖水，森記嘅蘿蔔糕同茶葉蛋都有人話唔錯，八方試過，可以咁講，味道唔係太突出，家覺得，都係那些年嘅糖水值得回味（其實仲有炸雞髀）。
mailto:[email protected]
