好多粉絲鍾意睇Pixar動畫，貪佢幽默風趣兼具深層意義；但另一邊死敵夢工場，一樣多捧場客！最新《功夫熊貓2》，高清藍光碟正式賣街，除咗勁玩中國農村風味，仲加入TrueHD7.1音效，拳來腳往打到嘭嘭聲梗唔少得，而阿寶終極一擊玩炮彈，更考驗到你支低音炮有幾深不可測！
記者：陳國輝
攝影：林栢鈞
背景紅磚生青苔
古色古香嘅村落、用瓦片搭建嘅屋頂，唔講仲以為係幅山水畫！《功夫熊貓2》跟第一集最似之處，就係充滿中國特色嘅山川背景。高清協會主席AlanLee就勁讚，佢話照足現實環境設計，尤其係藍光碟表達出一磚一瓦、凹凸地面嘅獨特質感，更細緻係連生長於石縫中間嘅青苔，都能夠清楚睇到，相當逼真！
音效方面，藍光碟支援英語TrueHD7.1以及粵語Dolby5.1，聽番陳奕迅同何韻詩嘅廣東話配音，好鬼親切。Alan話《功2》始終係套CG卡通，音效百分百以數碼製作，無乜好挑剔，更特別力讚結尾前阿寶爆發小宇宙一幕，佢將炮彈射向敵人怒炸賊船，炸聲震天，低頻表現出眾，令你一聽便知家中Subwoofer係龍定係蛇。
毛髮表現欠細緻
論畫功，背景逼真程度簡直爆晒燈！但角色設計方面，Alan就認為佢唔夠細緻，特別係阿寶同老虎嘅毛髮表現，睇落有些少假，好粗糙，其中一幕浸落水之後，毛髮仲變到「一粒粒」，感覺好奇怪；相反，佢建議大家不妨留意迪士尼齣《魔髮奇緣》，故事內男女主角嘅頭髮表現相當細緻，而且極有層次感；另外，Alan仲認為由於打鬥時嘅WideShot鏡頭太多，導致視覺上好混亂，唔容易投入。
今次除咗推出普通版Blu-ray，仲有1、2集孖碟裝，同DVD版最大出入，就係藍光版特別收錄「動畫創作靈感」、「動畫師專訪」以及「雜錦小花絮」等Bonus，一如好多夢工場嘅藍光碟一樣，喺播片嘅同時，仲支援畫中畫功能，俾你飽覽製作此片時嘅初稿，甚至乎到中國街道取景嘅情況！另外，凡到指定影碟舖購買該片Blu-ray或DVD碟，更有機會獲贈熊貓立體模型以及阿寶手指布偶，對《功》迷來講，夠晒吸引！
畫面：1080p
聲效：
英語TrueHD7.1
粵語Dolby5.1
特別收錄：星級配音逐個捉、刪剪片段、熊貓物語、功夫狂熱、旁白解說
