社會民怨不斷上升，下至街坊、上至工商界專業人士，冇邊個唔鬧煲呔冇做好佢份工、政府同地產商玩官商勾結，但係港鐵卻玩鴕鳥政策，唔俾人鬧。社民連副主席吳文遠向八方投訴，佢之前喺港鐵賣選舉廣告，一直相安無事，最近想改個廣告內容，加入「不滿曾蔭權的你」、「不滿官商勾結的你」兩句標語。
吳文遠以為呢兩句嘢應該冇乜大問題，點知港鐵嘅廣告代理公司覆佢，話呢兩句唔准用，因為會令人覺得，煲呔真係冇做好呢份工，以為香港真係有官商勾結、會侮辱到某一類人云云！吳文遠批評港鐵玩言論封殺，因為呢兩句話只係講出市民心聲同事實，港鐵大股東係政府，竟然如此明目張膽護主同偏袒大地產商，真係可怒也！港鐵之前曾以抽廣告，恐嚇傳媒唔好報道港鐵負面新聞，區區一個社民連，又點會放在眼內。